Deputeti i zgjedhur i Lidhjes Demokratike të Kosovës (LDK), Avdullah Hoti, ka deklaruar se Kuvendi i jashtëzakonshëm i partisë, i cili mbahet të enjten me kërkesë të delegatëve, është thirrur për të ushtruar kontroll demokratik ndaj lidershipit dhe për të adresuar rezultatet zgjedhore të LDK-së.
Përmes një postimi, Hoti tha se mekanizmi i Kuvendit të jashtëzakonshëm është i paraparë në Statutin e LDK-së, duke u bazuar në praktikat e partive simotra evropiane.
“Të enjten mbahet Kuvendi i jashtëzakonshëm i LDK-së me kërkesën e delegatëve. Ideologët e LDK-së, duke ndjekur praktikat e partive simotra të LDK-së në vendet e Bashkimit Evropian, e kanë paraparë këtë mekanizëm statutar për ushtrimin e kontrollit demokratik të delegatëve ndaj lidershipit të LDK-së”, ka shkruar Hoti.
Ai theksoi se thirrja e Kuvendit erdhi si pasojë e pakënaqësisë me rezultatet zgjedhore të partisë.
“Kuvendi i LDK-së është thirrur pasi nuk pajtohemi me humbjen në tri palë zgjedhjeve parlamentare dhe me humbjen e dy komunave në zgjedhjet lokale. Nuk mund të ulim kokën dhe të ndihemi rehat me këto rezultate të dobëta, siç po na thotë, praktikisht, lidershipi aktual i LDK-së duke kundërshtuar thirrjen e Kuvendit. Një LDK që e ul kokën përballë këtyre humbjeve nuk i shërben Kosovës”, u shpreh ai.
Sipas Hotit, lidershipi aktual nuk respektoi standardin e vendosur në vitin 2021, kur ish-kryetari Isa Mustafa kishte marrë përgjegjësinë për rezultatin zgjedhor dhe kishte hapur rrugën për zgjedhjen e Lumir Abdixhikut në krye të partisë.
Ai insistoi se Kuvendi nuk është organizuar për të rrëzuar apo emëruar një person të caktuar në krye të LDK-së.
“Kuvendi nuk është thirrur kundër askujt, por është thirrur për shkak se duam një LDK të fortë për betejat politike në mbrojtje të interesit të Kosovës. Na duhet një LDK e fortë për të larguar nga pushteti këtë mazhorancë”, deklaroi Hoti.
Në postimin e tij, Hoti renditi një sërë kritikash ndaj qeverisjes së Lëvizjes Vetëvendosje, duke përmendur, sipas tij, dëmtimin e aleancave strategjike, moszbatimin e Marrëveshjes së Uashingtonit, zhvillimet në dialogun me Serbinë, aferat në energjetikë, nepotizmin, presionin ndaj institucioneve të drejtësisë, si dhe dështimet në ekonomi, investime kapitale dhe shëndetësi.
Ai theksoi se lidershipi i ardhshëm i LDK-së duhet të dalë vetëm nga një proces i rregullt zgjedhor brenda partisë.
“Lidershipi i ri i LDK-së nuk mund të paracaktohet nga askush, as nga grupet jashtë LDK-së, as nga dëshirat e preferencat brenda LDK-së. Lidershipi i ri i LDK-së do të jetë rezultat i zgjedhjeve të përgjithshme në LDK, të cilat do të zhvillohen sipas Statutit dhe rregulloreve të LDK-së… Nuk ka rrugë tjetër për zgjedhjen e lidershipit të LDK-së përveçse përmes këtij procesi të përcaktuar në Statutin e LDK-së”, shtoi Hoti.
