Agjencia e Ushqimit dhe Veterinarisë (AUV) ka demantuar lajmet e publikuara në disa media, sipas të cilave janë bërë publike rezultatet laboratorike të mostrave të qumështit të marra nga Inspektorati më 2 korrik 2026.
Sipas AUV-së, institucioni nuk ka dërguar asnjë email me rezultate laboratorike, pasi analizat ende nuk kanë përfunduar.
Në reagimin zyrtar, AUV thekson se informacionet e publikuara nuk përfaqësojnë qëndrimin e institucionit dhe nuk burojnë nga ky institucion. Agjencia bën të ditur se analizat laboratorike të mostrave janë ende në proces përpunimi.
AUV rikujton se edhe në takimin e zhvilluar sot me përfaqësuesit e qumështores “Vita” dhe Shoqatës së Përpunuesve të Qumështit është theksuar se rezultatet zyrtare do të publikohen vetëm pasi të përfundojnë të gjitha analizat laboratorike dhe të verifikohen nga autoritetet kompetente.
Në fund, Agjencia u ka bërë thirrje mediave dhe opinionit publik që të mbështeten vetëm në komunikimet zyrtare të AUV-së dhe të shmangin publikimin e informacioneve të paverifikuara, të cilat mund të dezinformojnë publikun dhe të dëmtojnë besimin në procesin e kontrollit zyrtar.
