Një tjetër aksident trafiku ka ndodhur sot në rrugën “Isa Kastrati” në Prishtinë, pikërisht në afërsi të shkollës fillore “Iliria”, shkruan Infosot.
Si pasojë e shpejtësisë së madhe dhe papërgjegjësisë së vozitësve, një veturë ka përfunduar e përplasur direkt me rrethojat mbrojtëse, fare pranë vendit ku nxënësit kalojnë rrugën për në shkollë.
Ky incident ka ngritur sërish shqetësimin dhe revoltën e madhe të prindërve të nxënësve që ndjekin mësimet në këtë shkollë. Sipas tyre, kjo rrugë është kthyer në një rrezik të përhershëm për jetën e fëmijëve të tyre për shkak të mosrespektimit të rregullave të komunikacionit.
Prindërit bëjnë të ditur se tashmë kanë dorëzuar kërkesa zyrtare dhe një peticion drejtuar Komunës së Prishtinës për vendosjen urgjente të policëve shtrirë (pengesave për ngadalësimin e shpejtësisë). Mirëpo, përkundër premtimeve, komuna deri më tani nuk ka ndërmarrë asnjë veprim konkret për të siguruar këtë zonë.
“Nuk duhet të presim që të ndodhë ndonjë tragjedi që institucionet të zgjohen nga gjumi. Fëmijët tanë janë të rrezikuar çdo ditë,” u shprehën prindërit e shqetësuar.
Nëse Komuna e Prishtinës vazhdon të injorojë këtë situatë kritike, banorët dhe prindërit paralajmërojnë masa më radikale, duke kërkuar reagim të menjëhershëm para se të jetë tepër vonë.
