Komuna e Shtimes ka nënshkruar kontratë në vlerë prej 3 mijë e 864 euro për organizimin e një puntorie-trajnimi me stafin e administratës komunale, aktivitet i cili do të mbahet gjatë muajit maj në Shqipëri. Tenderi është realizuar përmes procedurës së kuotimit, ndërsa kontrata i është dhënë operatorit ekonomik “Sherif Salihi B.I.” nga Dragashi, raporton Infosot.
Sipas dokumenteve të tenderit, vlera e parashikuar e kontratës ka qenë 4 mijë euro, ndërsa oferta fituese ka qenë vetëm pak më e ulët, konkretisht 3 mijë e 864 euro. Në garë kanë qenë dy operatorë ekonomikë, ndërsa edhe oferta tjetër e përgjegjshme ka qenë shumë afër vlerës së parashikuar, me çmim prej 3 mijë e 998 euro e 20 centë.
Ajo që bie në sy në këtë tender janë specifikat teknike dhe shërbimet që duhet të përfshihen brenda kësaj vlere. Sipas kërkesave të komunës, operatori ekonomik duhet të sigurojë akomodim në hotel për tri net për 69 persona të administratës komunale, tri mëngjese, tri darka, si dhe nga një lëng dhe ujë gjatë çdo shujte. Përveç kësaj, hoteli duhet të ketë edhe sallë konference ku do të mbahet puntoria e stafit.
Në dokumente specifikohet se akomodimi duhet të organizohet me nga dy persona në dhomë, ose eventualisht tre persona “në kushte të njëjta”. Qyteti në Shqipëri ku do të mbahet trajnimi nuk është përcaktuar në tender, por thuhet se do të caktohet sipas marrëveshjes mes komunës dhe operatorit ekonomik. Edhe data e nisjes dhe kthimit do të përcaktohet më vonë me kontratë.
Tenderi parasheh që të gjitha këto shërbime të përfshihen në çmimin total të ofertës. Kjo do të thotë se brenda shumës prej 3 mijë e 864 euro duhet të mbulohen tri net fjetje për 69 persona, ushqimi për tri ditë, pijet gjatë vakteve dhe salla e konferencës për zhvillimin e trajnimit.
Në dokumentet e publikuara nuk jepen detaje shtesë për hotelin ku do të vendoset stafi, standardin e akomodimit apo përmbajtjen konkrete të trajnimit. Po ashtu, nuk sqarohet tema e puntorisë dhe as arsyet pse aktiviteti është planifikuar të mbahet jashtë Kosovës.
Kontrata është nënshkruar më 29 prill 2026 dhe do të ketë kohëzgjatje dy mujore.
KK Shtime Njoftimi per nenshkrimin e kontrates (Dokument)
