Asociacioni i Gazetarëve të Kosovës nëpërmes një reagimi thotë se e ka pritur me shqetësim njoftimin e gazetarit nga Radio Televizioni i Kosovës, Ridvan Berisha se ai është duke u ndier i pasigurt, pasi siç thotë ai linçimeve të fundit që vijnë nga subjekti politik “Vetëvendosje”.
“AGK-ja mbështet kolegun Ridvan Berisha dhe dënon çdo linçim ndaj gazetarëve në Kosovë”, shkruan në reagimin e kësaj organizate.
Njëherësh, AGK-ja kërkon nga subjektet politike që t’i ndalin sulmet ndaj gazetarëve të mediumit publik, pasi ditëve të fundit presioni mbi ta vetëm sa është rritur.
“Ua rikujtojmë të gjitha subjekteve politike se gazetarët e Radio Televizionit Publik të Kosovës nuk bënë të shndërrohen në pistë të shfryrjes së kundërshtimeve politike”, shkruan në reagimin e vet AGK-ja.
“Ne do të angazhohemi edhe me tej në kundërshtimin e çdo lloji të linçimit, sulmit dhe shantazhit në drejtim të kolegëve gazetarë”.
Përndryshe, RTK-ja gjatë kohës së fundit është përballur me mjaft sulme verbale dhe fizike. Vetëm gjatë dy javëve dy bomba janë hedhur mbi këtë medium.
Granata e parë e dorës është hedhur në oborrin e RTK-së kurse e dyta në shtëpinë e drejtorit gjeneral, Mentor Shala.
