Ministri kosovar i Punëve të Jashtme, Enver Hoxhaj, ka marrë mesazhe të qarta nga mbështetësit e Kosovës në BE se pa i përmbushur edhe kriteret e fundit që ka kërkuar Brukseli nuk do të ketë liberalizim të vizave për kosovarët. Hoxhaj ka marrë pjesë në Forumin e Bledit në Slloveni, ku ka zhvilluar një sërë takimesh me fokus liberalizimin e vizave për Kosovën, një ditë pas diskutimeve në Komitetin LIBE, në Parlamentin Evropian.
Hoxhaj ka zhvilluar një takim me eurodeputeten Tanja Fajon, me të cilën ka diskutuar për zhvillimet e 24 orëve të fundit sa i përket liberalizimit të vizave dhe hapat që duhet ndjekur sidomos nga ana e Kosovës në javët e ardhshme.
“Kisha një takim shumë të mirë me zonjën Tanja Fajon, e cila është një mikeshë dhe mbështetëse e madhe e Kosovës. Ditën e djeshme në komisionin të cilin ajo e drejton është marrë një votë pozitive sa i takon procesit të liberalizimit të vizave, por përderisa Parlamenti i Kosovës nuk e voton ratifikimin e Marrëveshjes për Demarkimin e kufirit me Malin e Zi nuk do të ketë një vendim pozitiv sa i takon liberalizimit të vizave dhe ky është mesazhi kryesor që Tanja Fajon ma dha sot në këtë takim”, ka thënë Hoxhaj.
Edhe Tanja Fajon ka shprehur përkrahjen e saj të parezervë për liberalizimin e vizave për Kosovën.
“Me ministrin diskutuam për hapat e ardhshëm se si dhe sa më shpejt të arrijmë heqjen e regjimit të vizave për Kosovën. Ministri Hoxhaj më siguroi se Qeveria e Kosovës do të bëjë gjithçka që është e mundur sa i përket këtyre hapave finalë si: ratifikimi i Marrëveshjes për Demarkacionin në Parlamentin e Kosovës dhe rezultate në luftimin e korrupsionit. Jam e kënaqur me votimin në LIBE dhe Kosova do ta ketë përkrahjen time të plotë. Shpresoj që do të vazhdojmë këtë rrugëtim sepse është shumë me rëndësi për Kosovën dhe qytetarët e saj”, citohet të ketë thënë Fajon.
Po ashtu, kryediplomati Hoxhaj ka zhvilluar edhe një takim me Harlem Desir, ministër për Çështje Evropiane të Francës, ku është shprehur përkrahja për liberalizimin e vizave, përkrahja për anëtarësimin në organizata ndërkombëtare dhe përgëzime për përmbushjen e reformave në agjendën evropiane, bëhet e ditur në njoftimin për medie.
Hoxhaj pasdite do të flasë në panelin me ministrat e Jashtëm të rajonit për raportet e Ballkanit me BE-në dhe perspektivën euroatlantike.
