Kryetari i Kuvendit, Kadri Veseli e ka dënuar sulmin ndaj shtëpisë së kryetarit të Komisionit qeveritar për caktimin e vijës kufitare të Kosovës me Malin e Zi, Murat Mehës.

“Hedhja e mjetit shpërthyes në familjen e z.Murat Meha përbën një akt të dënueshëm dhe njëherit një paralajmërim shqetësues të tendencave që synojnë të nëpërkëmbin shtetin ligjor në Kosovë”, ka thënë Veseli.

Sipas tij, akte të tilla të rënda, që në kundërshtim edhe me moralin e popullit tonë, nuk hezitojnë të cenojnë integritetin e familjes, duhet të marrin përgjigjen e merituar ligjore nga mekanizmat shtetërorë të sigurisë dhe drejtësisë, e jo të mbesin anonime dhe të pandëshkuara.

Tutje, ai ka thënë se qytetarët tanë duhet të kenë besim se shteti i Kosovës është në gjendje të plotë për të garantuar sigurinë e tyre, rendin publik dhe sundimin e ligjit.