Ndihmëssekretarja amerikane e Shtetit, Victoria Nuland, ka nisur takimet në Prishtinë me përfaqësuesit e institucioneve të Kosovës. Nuland , fillimisht është takuar me presidentin Hashim Thaçi dhe më pastaj edhe me kryetarin e Kuvendit, Kadri Veseli.
Nuland do të takohet edhe me përfaqësuesit e tjerë të institucioneve të Kosovës, si dhe ata të shoqërisë civile.
Nuland me zyrtarët në Prishtinë do të bisedojë për përparimin në zbatimin e marrëveshjeve të arritura në Bruksel, në kuadër të dialogut ndërmjet Kosovës dhe Serbisë, si dhe për procesin e integrimeve evropiane dhe luftën kundër korrupsionit dhe krimit të organizuar, ka thënë në njoftimin e tij Departamenti Amerikan i Shtetit.
Ndihmëssekretarja amerikane e Shtetit me takimet në Prishtinë, ka nisur vizitën e saj në rajonin e Ballkanit dhe gjatë ditës do të udhëtojë për në Tiranë, dhe më 11 korrik do të vazhdojë vizitat edhe në Beograd e Shkup.
Vizita e ndihmëssekretares Nuland në rajonin e Ballkanit bëhet për t’u dhënë mbështetje proceseve integruese dhe në veçanti bashkëpunimit rajonal, në kohën kur problemet e brendshme të pothuajse secilit shtet veç e veç, kanë ndikuar mbi këtë proces.
Posaçërisht thuhet se Nuland do t’i kushtojë kujdes dialogut të Kosovës me Serbinë dhe zbatimit të marrëveshjeve të arritura në Bruksel.
Në fund të vizitës së saj në Ballkan, Victoria Nuland, do të udhëtojë për në Qipro. (REL)
