Presidenti i Kosovës, Hashim Thaçi, ka komentuar dorëheqjen e Ferid Aganit nga posti i ministrit pas ngritjes së aktakuzës nga Prokuroria për keqpërdorime gjatë kohës sa ka qenë ministër i Shëndetësisë.
Thaçi ka vlerësuar se rasti i Aganit, duhet të bëhet shembull i sjelljes në pajtim me etikën institucionale.
“Le të jetë ky shembull i sjelljes në pajtim me etikën institucionale, dhe i gatishmërisë për qeverisje të mirë. Kosova është në rrugë të mbarë të integrimit evropian dhe jemi në prag të liberalizimit të vizave”, ka shkruar Thaçi, transmeton lajmi.net
Ai ka shtuar se sundimi i ligjit mbetet jetik për të ardhmen e Kosovës dhe është zotuar si President se askush me aktakuzë apo të dënuar nuk duhet të jenë pjesë e institucioneve.
Postimi i plotë i Thaçit:
Si president i vendit e mirëpres gatishmërinë dhe vendimin e z. Ferid Agani për t’u liruar nga detyra e ministrit, për t’u lënë organeve të drejtësisë që të kryejnë punën e tyre. Le të jetë ky shembull i sjelljes në pajtim me etikën institucionale, dhe i gatishmërisë për qeverisje të mirë. Kosova është në rrugë të mbarë të integrimit evropian dhe jemi në prag të liberalizimit të vizave. Sundimi i ligjit mbetet jetik për të ardhmen euroatlantike të Republikës së Kosovës. Si president i vendit zotohem para qytetarëve se askush me aktakuza apo të dënuar nuk duhet të jenë pjesë e institucioneve të Republikës së Kosovës.
