Qeveria e Gjermanisë ka lavdëruar qeverinë e Kosovës për tolerancën dhe respektin që po tregon për komunitetet pakicë në Kosovë.
Veçmas qeveria gjermane ka lavdëruar policinë e Kosovës, e cila me shumë sukses ka arritur të ketë shumë pjesëtarë të komuniteteve, t’i trajnojë dhe angazhojë ata në punë, në radhët e veta
Në një përgjigje dhënë për gjendjen dhe trajtimin e minoriteteve në Kosovë, të shtruar si pyetje në Bundestagun gjerman nga partia e majtë opozitare “Die Linken”, qeveria gjermane ka theksuar se qeveria e Kosovës po bën punë shumë të mirë për përmirësimin e pozitës së minoriteteve në Kosovë.
Një punë të mirë në këtë drejtim po bëhet në Ministrinë për Minoritete dhe Kthim, thuhet nga qeveria gjermane. Në përgjigjen e qeverisë gjermane për deputetët e partisë së majtë opozitare në Bundestagun gjerman, thuhet se edhe në administratat komunale, anembanë Kosovës ka të ngritura zyra, që kujdesen për përmirësimin e pozitës së minoriteteve dhe kthimin e tyre.
Veçmas, thuhet në përgjigjen e qeverisë gjermane, shembull në këtë drejtim paraqet Policia e Kosovës, e cila me shumë sukses ka arritur të ketë shumë pjesëtarë të komuniteteve, t’i trajnojë dhe angazhojë ata në punë në radhët e veta. Në përgjigjen e qeverisë gjermane thuhet, gjithashtu, se në vitin 2009, nga qeveria e Kosovës është krijuar një strategji për integrimin e minoriteteve e cila si pikë me rëndësi ka, para së gjithash, diskriminimin gjinor, arsimin, punësimin, shëndetin dhe strehimin për minoritetet në Kosovë. /Fadil Gashi/RTK/
