Ministria e Arsimit në bashkëpunim me Ministrinë e Administratës dhe kompaninë Microsoft e kanë lansuar platformën digjitale “Microsoft Showcase Classroom 365”, e cila do t’u mundësojë mësimdhënësve dhe nxënësve për mësim inovativ dhe ngritje të shkathtësive të tyre përmes mësimit digjital.

Ministria i Arsimit, Arsim Bajrami, tha se me këtë projekt po kontribuohet në modernizimin e sektorit të arsimit.

“Sot do të hapim qendrën inovative në MASHT e cila do të jetë një promovim i produkteve të kompanisë Microsoft në modernizimin e sektorit të arsimit, do të prezantojmë platformën Microsoft 365, një platformë shumë e rëndësishme e cila mundëson trajnime për akterë të ndryshëm të sistemit të arsimit, duke filluar nga mësimdhënësit nga udhëheqësit e sistemit arsimor në mënyrë që të japim një kontribut në modernizimin e sektorit të arsimit’, ka thënë ai.

Megjithatë, Bajrami e ka pranuar se menjëherë nuk do të mund të fillohet aplikimi i kësaj platforme në të gjithë Kosovën pasi që në vendet rurale nuk ka kushte të teknologjisë informative.

“Ne i dimë problemet në shkollat tona, e dimë se kemi ende shumë për të punuar për shkolla, natyrisht nuk do të mund t’i përfshijmë 1100 shkolla por planet e MASHT-it janë shumë të qarta që në fazën e parë t’i përfshijmë 100 shkolla të cilat do të pajisen me mësimin digjital, pastaj do të vijmë në një dinamikë të llogaritur në 300 dhe me një periudhë të caktuar do të mund të përfshihen të gjitha shkollat e Kosovës. Nuk kemi iluzion që kjo do të përfshijë gjithë sistemin arsimor, do të shkojmë me kujdes e dini se në disa shkolla kjo veç funksionon”, ka deklaruar ai.

Ndërkohë, ministri i Ministrisë së Administratës, Mahir Yagcilar, tha se teknologjia e informacionit në kohën e sotme është vendimtare për konkurrencë në tregun global.

“Bazuar në faktin se invoacioni dhe teknologjia e informacionit janë vendimtare në hapjen e mundësive të reja, që e rrisin konkurrencën dhe avancojnë prioritetet kombëtare atëherë si shtetet tjera edhe shteti ynë do të forcoj aftësitë e saj për të konkurruar në tregun global. Në këtë kontekst, duhet të rrisim përfshirjen digjitale, të adaptojmë dhe përmirësojmë sistemin e arsimit dhe të përgatisim të rinjtë për ekonominë globale”, ka deklaruar ai.

Kurse, përfaqësuesi i zyrës së “Microsoft”-it për rajon, Ljupco Georgiev, tha se kjo do t’u mundësoj politikbërësve të arsimit që të ngrisin shkathtësitë në hap me trendët e shekullit 21.

“Ky është një rezultat i përpjekjeve tona të përbashkëta me MASHT-in duke synuar që të themelojmë një qendër inovative në kuadër të ndërtesës së MASHT-it e cila u mundëson politikbërësve të arsimit, palëve tjera me interes dhe me influencë dhe drejtuesve të shkollave t’i eksplorojnë dhe të mësojnë se si programet e ‘Microsoft’-it në arsim i ngrisin shkathtësitë e shekullit 21 për nxënësit”, tha ai.

Qendra e kësaj platforme digjitale është hapur në objektin e MASHT-it dhe është pjesë e projektit të këtij institucioni “E-Shkolla”.