Institucionet e Kosovës ende nuk e dinë se kur do të merret vendimi për heqjen e vizave për kosovarët. Pas propozimit të Komisionit Europian për heqje të vizave, më 4 maj janë dhënë data të ndryshme se kur kosovarët do të mund të lëvizin lirshëm në zonën Schengen, por deri më tani nuk ka ndonjë datë të saktë.

Në Ministrinë e Integrimeve Europiane të Kosovës (MIE), e cila e ka udhëhequr këtë proces, thonë se propozimi i Komisionit Europian është duke u shqyrtuar dhe, se vendimi për heqjen e vizave, merret nga Parlamneti Europian dhe Këshilli i BE-së, raporton lajmi.net

Mediat në vend, sot kanë shkruar se vendimi për heqjen e vizave për Kosovën mund të ndodhë në vjeshtë dhe se Parlamenti Europian e Këshilli i Ministrave të BE-së, nuk do të diskutojnë gjatë kësaj jave për çështjen e liberalizmit të vizave për Kosovën.

Ndërsa në Ministrinë e Integrimeve Europiane thonë se ky proces është në fazën e fundit, por nuk kanë dhënë ndonjë datë se kur mund të ndodhë një gjë e tillë.

“Propozimi i Komisionit Evropian për liberalizim të vizave për qytetarët e Kosovës, bazuar në procedurat e brendshme ligjore të institucioneve të Bashkimit Evropian, duhet të miratohet nga Parlamenti Evropian si dhe Këshilli i BE-së”.

“Aktualisht ky propozim është duke u shqyrtuar nga Parlamenti Evropian, institucion ky që ka emëruar edhe raportuesen për Kosovë për procesin e vizave”.

“Çështja e liberalizimit të vizave tani po kalon aspektet e fundit procedurale në institucionet e BE-së dhe afati për përfundimin e tyre varet nga këto institucione”, thuhet në përgjigjen e ministrisë për lajmi.net.

Komisioni Europian me 4 maj të këtij viti ka dhënë rekomandimin për heqjen e vizave për Kosovën, ndërsa nga zyrtarë të BE-së, është kërkuar që Kosova ta votojë marrëveshjen për Demarkacionin me Malin e Zi para se Parlamenti Europian dhe Këshilli i Ministrave të BE-së, ta marrin një vendim për këtë.

Ky kusht i BE-së është cilësuar si i padrejtë nga paritë opozitare në Kosovë, të cilat këtë marrëveshje e kanë kundërshtuar që nga nënshkrimi i saj.

Madje, ato kanë paralajmëruar se do ta pengojën ratifikim e saj në Kuvend dhe do të organizojë dhe protesta.