Bajram Gecaj, këshilltari i kryeministrit Isa Mustafa, nëpërmes një postimi në rrjetin social Facebook ka thënë se të gjithë janë çuar kundër LDK-së, vetëm pse iu dha mundësia që ta udhëheq qeverinë.
Gecaj ka shkruar në Facebook se që nga formimi i qeverisë së re, LDK është duke u sulmuar pamëshirshëm, duke synuar edhe përmbysjen me dhunë të vetmes qeveri të pas luftës që udhëhiqet nga LDK-ja.
Ky është postimi i plotë i Gecajt:
Është për tu çuditur se si në lidhje me zhvillimet brendapërbrenda apo përreth LDK-së opinionit publik i servohen në vazhdimësi me një kujdes djallëzor e inat të papërmbajtur të pavërteta, gjysmë të vërteta e trillime ndjellakeqe. Derisa në një farë mënyre më duken të pritshme shtrembërimet dhe devijimet e së vërtetës nga ana e grupeve dhe forcave politike rivale, më zhgënjen posaçërisht fakti se si individë dhe grupe të ndryshme, të cilat në kontinuitet thirren në procese transparente dhe në demokraci, në vend se të përqendrohen në aktivitetet substanciale dhe të rëndësisë parimore, merren me veprime anësore dhe margjinale rreth e përreth zhvillimeve në LDK që ta justifikojnë sulmin në thelb, sulmin në qendër. Sa me lehtësi po harrohet se kjo parti është e vetmja e cila gjithsecilën fazë të aktivitetit po e zhvillon në mënyrën më transparente të mundshme, me debate të hapura, me deklarime pa kurrfarë limitimesh, por edhe me tolerancë përmbajtësore edhe ndaj kritikave jo rrallë të pavend e shpesh të paargumentuara.
Zërat e tillë posaçërisht rriten e shtohen atëherë kur LDK merr timonin e udhëheqjes, timon të cilin din dhe mundet ta drejtoj më mirë se kushdo tjetër. Që nga formimi i qeverisë së re, LDK dhe strukturat e saja udhëheqëse në institucionet shtetërore, janë sulmuar në mënyrën më të vrazhdë dhe më të pamëshirshme të mundshme, duke synuar edhe përmbysjen me dhunë të së vetmes qeveri të udhëhequr nga Lidhja Demokratike e Kosovës në periudhën e pasluftës. Duket se udhëheqja e qeverisë, për të parën herë nga një akademik, është shndërruar çuditshëm “halë në sy” të të gjithë atyre të cilët i frikohen suksesit dhe rrjedhimisht rritjes së partisë më të vjetër shtetformuese në Republikën e Kosovës. Duket se, ashtu si shumë herë më parë, edhe këtë herë, kundërshtarët e zjarrtë të partisë së liderit historik, Dr. Ibrahim Rugovës, janë ringjallur në elementin e tyre më destruktiv të mundshëm të dëmtimit të interesit shtetëror e nacional, për hir të interesave të tyre të ulëta klanore, parciale e individuale.
Kryeministër, përkundër të gjithave mos u merakos me zërat kundërshtarë, sepse LDK ka qenë gjithherë e rrethuar nga zilia dhe ziliçarët, por gjithmonë ka ditur të përballet dhe ti mposhtë ata. Edhe këtë herë këto sfida do t’i tejkalojmë me sukses, sepse partia e Ibrahim Rugovës nuk gjunjëzohet kurrë. Ne kemi më shumë përvojë e durim se që ata kanë zili e djallëzi.
Urime dhe përgëzime për organizimin në mënyrën më demokratike të mundshme të “Këshillit Qendror”. Gjithashtu suksese në organizimin e “Kuvendit të Punës” së 28 majit, i cili, ashtu si edhe shumë të tjerë më parë, me siguri se do të sjell, inovacione dhe unifikim të strukturave dhe rrjedhimisht edhe të anëtarësisë së gjerë të partisë.
