Gjykata Kushtetuese ka vendosur që t’i anulojë dy vendime të Agjencisë Kosovare të Pronës që kishin të bënin me Manastirin e Deçanit. Ajo ka ardhur në përfundim që këto vendime të Kolegjit të Ankesave të Dhomës së Posaçme të Gjykatës Supreme të Republikës së Kosovës për Çështje që Lidhen me Agjencinë Kosovare të Privatizimit të jenë të pavlefshme, duke e kthyer gjithçka në gjendjen fillestare.
Mirëpo, jo të gjithë gjyqtarët kishin votuar pro këtij vendimi. Gjyqtari Bekim Sejdiu, është ai i cili jo vetëm që votoi kundër këtij vendimi, por kishte votuar edhe kundër pranueshmërisë së lënës, raporton Gazeta Blic.
Edhe në aktgjykimin e shpallur nga Gjykata Kushtetuese, shihet se më datë 19 maj 2016, kur gjykata aprovoi me shumicë votash pranueshmërinë e kërkesës, gjyqtari Bekim Sejdiu votoi kunër pranueshmërisë.
“Të njëjtën ditë, Gjykata votoi me shumicë votash për gjetjen e shkeljes. Gjyqtari Bekim Sejdiu votoi kundër gjetjes së shkeljes”, thuhet në pikën e 18-të të këtij aktgjykimi, raporton Gazeta Blic.
Ky reagim ka nxitur reagime të shumta. Lidhja e Historianëve ka reaguar ndaj vendimit, duke thënë se do të protestojnë para Gjykatës Kushtetuese.
Në anën tjetër, kryetari i Deçanit, Rasim Selmanaj këtë vendim e ka quajtur tradhëti.
“Turp e tradhti e Gjykatës Kushtetuese ndaj interesave të vendit e të popullit! Ndërhyrje politike dhe shkelje e ligjit e drejtësisë! Turp! Kurrë ky vendim s’ka me u pranuar e as zbatuar nga Komuna që unë e drejtoj! Manastiri nuk mund të behët pronar i këtyre pronave! Qytetarët e Deçanit dhe unë personalisht do ta kundërshtojmë fuqishëm këtë vendim politik dhe të turpshëm”, ka shkruar thënë Selmanaj.
