Rektori i Universitetit të Prishtinës, Marjan Dema, ka lejuar që profesorët të kenë paga të dyfishta.
Një vendim të tillë rektori Dema e ka marrë dy ditë më parë dhe profesorëve u jepet mundësia e marrjes së pagave të dyfishta, e cila deri më tash ishte ndaluar nga paraardhësi i tij në këtë detyrë, ish rektori Ramadan Zejnullahu.
Madje rektori Demaj, një vendim të tillë e ka marrë ende pa u marrë një vendim në lidhje me këtë çështje nga ana e Gjykatës Themelore në Prishtinë.
Kushtrim Palushi, avokat i UP-së i kontraktuar në kohën e ish rektorit Zejnullahu, ka deklaruar për gazetën Zëri se menaxhmenti aktual i UP-së nuk duhet të ngutet të dezinformojë opinionin e sidomos kur bëhet fjalë për paratë e taksapaguesve dhe interesin e përgjithshëm publik.
Ai deklaroi se menaxhmenti aktual po dezinformon kur deklaron se Gjykata Themelore ka marrë vendim në favor të profesorëve.
“Gjykata Themelore ende nuk e ka gjykuar këtë rast përmes vendimit përfundimtar”, ka thënë ndër të tjera avokat Palushi.
