Derisa ka përmendur prioritet që duhet te ketë vendi, kreu i PDK-së, Kadri Veseli, ka thënë se lufta ndaj korrupsionit duhet të jetë angazhim i secilit që ka përgjegjësi publike. “A do rrimë duarkryq që ta lëmë korrupsionin që të na pengojë të ardhmen e fëmijëve tanë? Ne kemi obligim të çrrënjosim nga administrata jonë publike mentalitetin e ryshfetit dhe favoreve të paligjshme. Do të angazhohemi për forcimin e shtetit ligjor, për konsolidimin e prokurorisë dhe gjyqësorit për të rritur efikasitetin, integritetin, profesionalizmin dhe pavarësinë e sistemit të drejtësisë. Do të investojmë në ngritjen e kulturës tonë juridike, që të rrisim vetëdijen qytetare, sensin e përgjegjësisë individuale, vigjilencën dhe guximin për të denoncuar çdo rast korruptiv. Ne do t’i japim fund pasigurive ligjore, dhe pengesave burokratike, që demotivojnë njerëzit e punës dhe të biznesit të ligjshëm. Nuk do të kemi asnjë tolerancë ndaj abuzimit me postet publike dhe ndaj korrupsionit”, ka thënë Veseli para të pranishmëve në Konventën e PDK-së. Veseli: Nuk e kemi fituar luftën që të humbim paqenKryetari i PDK-së, Kadri Veseli, ka thënë se ne kemi një popull punëtor, një rini gjithë energji, një tokë të begatë dhe shpirt ndërmarrësie.“Është detyra jonë që gjithë ky potencial të çlirohet dhe shndërrohet si uragan i zhvillimit! Këtë e presin qytetarët nga ne, nga Partia Demokratike e Kosovës”, ka thënë Kadri Veseli, kreu i PDK-së, në fjalimin e tij para të pranishmëve në ditën e dytë të konventës së PDK-së. “Sa herë që vendi ynë ndodhet në udhëkryq, populli e kthen kokën nga ne! Unë jam këtu për t’ju thënë, se nuk kemi fituar luftën që sot të humbim paqen. Ka shumë probleme që mundojnë jetën e qytetarëve tanë, e që kërkojnë përgjigje nga ne. Unë do përpiqem, sa të mundem, që të gjej zgjidhjen më të mirë dhe më konkrete për brengat e qytetarëve tanë.”Ndoshta disa përgjigje të mia mund të mos jenë aq efikase sa shpresoj, por ju siguroj se nuk do ndalem së kërkuari rrugën e duhur, që sjell zhvillimin dhe mirëqenien e qytetarëve”, ka thënë ai.
