Kryediplomatja e Bashkimit Evropian, Federica Mogherini ka lavdëruar institucionet e Kosovës për punën e bërë për liberalizimin e vizave.
Komisioni Evropian, dje rekomandoi liberalizimin e vizave për kosovarët dhe, sipas Mogherinit, që mbajti një fjalim në Kuvendin e Kosovës, kjo ditë është shumë e rëndësishme jo vetëm për Kosovën, por edhe për Bashkimin Evropian. Ajo ka ftuar për bashkëpunim të mëtejmë të Kosovës me BE-në.
“Njerëzit në Kosovë dhe dini edhe ju që kjo është një ditë shumë e rëndësishme për Kosovën. Një javë shumë e mirë për Kosovën. Nuk dua të marr merita për pranimin në UEFA, por dje arritën një sukses të madh. Kjo falë punës së madhe që keni bërë së bashku me ne. Sot duhet të bëhen planifikimet për të ardhmen e përbashkët. Liberalizimi i vizave nuk festohet vetëm në Kosovë, por edhe Bashkimi Evropian po feston”, ka thënë Mogherini.
Përfaqësuesja e Lartë e BE-së për Politika të Jashtme, Frederica Mogherini në fjalimin e saj para deputetëve të Kuvendit të Kosovës, tha se dhurata që Bashkimi Evropian po ia jep Kosovës nuk duhet të nënçmohet.
Ajo tha se agjenda evropiane është ajo që mban popujt e bashkuar, derisa tha se edhe pranimi në UEFA është meritë e përbashkët.
“Agjenda Evropiane na mban të bashkuar. Nuk dua ta marrë meritën për UEFA-n, por dje arritët një sukses, dhe kjo falë punës tuaj së bashku me ne”, tha ajo.
Mogherini theksoi se vetëm një muaj më parë u prezantua Marrëveshjen për Stabilizim-Asociimin, kurse dje u dha rekomandimi për liberalizimin e vizave. Këto sipas Mogherini janë suksese të mëdha për Kosovën, llogaritur prej ku ka filluar rrugëtimin drejt Evropës vendi.
Mogherini tha se BE-ja po punon për paqen dhe pajtimin në Ballkan.
“Bashkimi ynë ka të bëj për mirëqenien e njerëzve. Është e qartë se ne duhet të bëjmë shumë më tepër që të zhvillojmë ekonominë, ta luftojmë korrupsionin dhe njerëzve t’u afrojmë perspektivë më të mirë”, theksoi ajo.
“Mos e nënçmoni dhuratën që po ua jep Bashkimi Evropian. Më lejoni të premtoj se do të vazhdojmë që ta bëjmë Kosovën më të mirë. Nga ana ime ky është një përkushtim”, vazhdoi Përfaqësuesja e Lartë e BE-së.
Ajo po ashtu i dha merita autoriteteve të Kosovës për dy lajmet e fundit të Kosovës, duke përfshirë edhe liberalizimin e vizave.
“Propozimi për lëvizje të lirë në zonën e Shengenit është një dëshmi për punën tuaj të madhe”, tha ajo.
