FIFA ka kohë që kishte shfaqur vullnet për të bërë zgjidhje për futbollin e Kosovës. E kishte përfshirë FFK-në në sistemin TMS të transferimit të lojtarëve, ndërsa ia kishte lejuar miqësoret në janar të vitit 2014, me gjithë kundërshtimin e UEFA-s.
Por FIFA nuk e kishte të mundur të pranonte Kosova pa pranim paraprak të saj në konfederatën gjegjëse, përkatësisht në UEFA. Pengesa e madhe u kalua të martën. Dhe presidenti i FIFA-s, Gianni Infantino, paralajmëroi pranimin e Kosovës në FIFA në fjalimin që e mbajti para delegatëve të UEFA-s, shkruan sot Koha Ditore.
Pas kalimit të pengesës së madhe, kompletimi i procesit të ndërkombëtarizimit të futbollit kosovar pritet të jetë shumë më i lehtë. Që ky proces të jetë i kompletuar, ka mbetur që Kosova të pranohet në FIFA, që përfaqësuesja të fitojë të drejtën e garimit në eliminatoret për botërorin e vitit 2018 dhe që klubet të mësojnë se kur do të nisin garimin evropian.
FFK-ja të martën është pranuar në UEFA, Konfederatën Evropiane të Futbollit, me efekt të menjëhershëm. Vendimi u mor në Kongresin e UEFA-s që u mbajt në Budapest. Kërkesa e Kosovës u përkrah nga 28 delegatë, që ishte minimumi i mundshëm për pranim të Kosovës.
Tani Kosova pritet të pranohet në Federatën Ndërkombëtare të Futbollit (FIFA). Kërkesa e Kosovës është në agjendën e Kongresit të FIFA-s që do të mbahet më 13 maj në Meksikë. Nuk pritet të ketë pengesa të mëdha që kërkesa për pranim në FIFA të kalojë.
