Procesi për liberalizimin e vizave “nuk është duke i numëruar ditët dhe javët, por mund të them se është duke i numëruar orët”, ka deklaruar sot presidenti i Republikës së Kosovës, Hashim Thaçi.
“Mund të them se Kosova ka zbatuar të gjitha kriteret e nevojshme për rekomandimin e vizave nga Brukseli, prandaj dua të potencoj se procesi për liberalizmin e vizave për Kosovën tashmë nuk është duke i numëruar ditët dhe javët, por mund të themi se është duke i numëruar orët dhe ky është një lajm i mirë dhe histori e re për Kosovën”, është shprehur Thaçi.
Presidenti Thaçi këtë deklarim e ka bërë pas një takimi që ka pasur me kreun e Federatës së Futbollit të Kosovës, Fadil Vokrri.
Lidhur me procesin e liberalizimit të vizave për Kosovën ka komentuar edhe ministri kosovar i Integrimeve Evropiane, Bekim Çollaku.
Përmes një postimi në rrjetin social Facebook, Çollaku ka thënë se kjo javë do të jetë shumë dinamike dhe e mbushur me lajme historike për shtetin tonë të ri, transmeton rel.
“Këto lajme që do vinë, edhe pse të vonuara pa fajin tonë, dhe do të gëzojnë shumë të gjithë qytetarët e Republikës së Kosovës. Me lejoni të marr guximin dhe paragjykoj sukses të plotë të Kosovës, i cili është plotësisht i merituar. Prandaj, në mënyrë krejt të pazakonshme, iu uroj paraprakisht të gjithë qytetarëve të Republikës së Kosovës për sukseset historike të kësaj jave”, ka thënë Çollaku, duke aluduar në dhënien e rekomandimit për liberalizim të vizave për Kosovën, si dhe pranimin e mundshëm të Kosovës në UEFA.
