RTK-ja është thellësisht i shqetësuar me fyerjen e rëndë që i është bërë Kosovës nga Grupi i Referencës për Këngën e Eurovizionit të cilët e ndalojnë flamurin e Kosovës të valëvitet në këtë festival.
Radio Televizioni i Kosovës është thellësisht i shqetësuar që flamurin e Kosovës e vendosin në listën e njëjtë ku janë edhe flamuj të organizatave terroriste (ISIS-it) dhe vendeve tjera që janë të kontestuara ndërkombëtarisht. Ky vendim vjen vetëm disa ditë para se RTK të marrë pjesë pikërisht në takimin e Grupit të Referencës ku pritej të merrej vendimi nëse Kosova do të marrë pjesë ose jo vitin e ardhshëm në këngën e Eurovizionit.
Dëshirojmë t’ua bëjmë me dije edhe Grupit të Referencës së Këngës së Eurovizionit por edhe EBU se Republika e Kosovës është e njohur nga rreth 120 shtete të botës. Populli I Kosovës është I dëshmuar si popull paqësor dhe Republika e Kosova asnjëherë nuk ka paraqitur rrezik për askënd, madje ka qenë e hapur ndaj të gjithëve. Këtë e dëshmon edhe Radio Televizioni i Kosovës i cili në kuadër të saj prodhon program për të gjitha komunitetet në Kosovë, ndërsa vetëm për komunitetin serb ka hapur kanal të veçantë televiziv, gjë që nuk e kanë bërë as Serbia për komunitetin shqiptar në Serbi, e as vendet tjera të rajonit.
Vendosja e flamurit të Republikës së Kosovës në listën e njëjtë me flamujt edhe të organizatave terroriste është racizëm, por edhe fyerje e rëndë për qytetarët e Republikës së Kosovës por edhe për vetë Radio Televizionit të Kosovës.
RTK ka pasur bashkëpunim të shkëlqyeshëm me EBU, kemi marrëveshje të nënshkruar, dhe dëshiroj të besoj që ky veprim i Grupit të Referencës për Këngën e Eurovizionit nuk është marrë me dijeninë e menaxhmentit të EBU-së, prandaj si Drejtor i Përgjithshëm i RTK-së kërkoj që flamuri i Republikës së Kosovës të hiqet menjëherë nga ajo listë për shkak se ky veprim ka rritur menjëherë presionet ndaj Radio Televizionit të Kosovës për të shkëputur marrëdhëniet me EBU.
