Kosova që nga e hëna po lejon hyrjen e kamionëve nga Serbia që transportojnë naftë e gaz. Kjo pasi këtë ditë ka hyrë në fuqi marrëveshja për njohjen reciproke të certifikatave ADR midis Kosovës dhe Serbisë, të ndërmjetësuar nga Bashkimi Evropian.
Për njohësit e çështjeve të ekonomisë, me hyrjen në fuqi të kësaj marrëveshjeje edhe zyrtarisht Serbia e ka njohur shtetin e Kosovës. Njohësi i ekonomisë, Musa Limani thotë se kjo marrëveshje duhet parë më shumë si arritje politike.
Limani thotë se me këtë marrëveshje kanë humbur të dyja shtetet, Kosova dhe Serbia. Megjithatë , sipas tij, humbjet nuk janë asgjë. Ai thotë se e rëndësishme është njohja e shtetit nga ana e Serbisë.
Për më shumë se një muaj, si kundërpërgjigje për bllokadën e Serbisë për importin nga Kosova, Qeveria e Republikës së Kosovës pati marrë vendim për masa reciprociteti për mosnjohjen e certifikatave dhe pati ndaluar importin e mallrave të rrezikshme nga Serbia.
Për këtë ishin deklaruar edhe zyrtarë qeveritarë. Ata thoshin se reciprociteti po i shkakton humbje buxhetit të shtetit.
Në atë kohë, ministri i Financave Avdullah Hoti, me anë të një postimi në rrjetin social Facebook ka thënë se që nga data kur është vendosur reciprocitetit me Serbinë, buxheti i Kosovës po humb rreth 100 mijë euro në ditë.
Kronika e përgatitur nga Tribuna Channel.
