Me rastin Ditës Ndërkombëtare të Tokës, sot më 22 prill, Ministria për Forcën e Sigurisë së Kosovës(MFSK) dhe FSK-ja organizuan aktivitete të ndryshme në pastrimin e ambientit dhe mbjelljen e fidanëve-drurëve dekorativ dhe luleve, në hapësirat e Ministrisë dhe kazermave të FSK-së si dhe në disa ambiente publike.
Aktiviteti kryesor u mbajt në ambientet e Ministrisë dhe Kazermën “Adem Jashari” në Prishtinë, ku në shënimin e Ditës së Tokës morën pjesë: zëvendësministrat Fadil Gashi dhe Muhamet Latifi, sekretari i përgjithshëm i MFSK-së, z. Shkëlzen Sylaj, gjeneralët Zymer Halimi, Nazmi Brahimaj dhe Gëzim Hazrolli, oficerë dhe ushtarë të FSK-së si dhe safi civil i Ministrisë.
Aksionin për shënimin e Ditës Ndërkombëtare e ka përshëndetur zëvendësministri Fadil Gashi i cili ka falënderuar të gjithë pjesëmarrësit në pastrimin e ambienteve të Ministrisë dhe FSK-së. Ky aksion për pastrimin e ambientit të mos jetë vetëm një ditë, por çdo ditë t’i kushtojmë kujdes mjedisit dhe ambientit ku jetojmë. Ai kërkoi që të jemi sa më aktiv në mbrojtjen dhe kujdesin për mjedisin tonë, por edhe ambientit të përgjithshëm me qëllim të përmirësimit të kualitetit dhe ambientit në të cilin jetojmë dhe punojmë,transmeton indeksonline.
Ky aksion për shënimin e Ditës Ndërkombëtare të Tokës u shënua në të gjitha kazermat e FSK-së. Aksionit për pastrimin dhe mbjelljen e fidanëve në Ministri dhe FSK iu bashkuan edhe pjesëtarët e NAT-it, NLAT-it (Ekipi Këshillues dhe Ekipi Ndërlidhës i NATO-s për FSK-në). Po ashtu në kuadër të bashkëpunimit Civilo-Ushtarak, FSK-ja sot, për Ditën e Tokës ka qenë e angazhuar me mjetet teknike dhe personel në Lagjen , “Emshiri” dhe në Hajvalli- hapsirat e Pallatit të Drejtësisë, në Prishtinë.
