Qeveria e Kosovës ka njoftuar për bisedimet që janë zhvilluar në Bruksel me delegacionin e Serbisë.
Sipas njoftimit, në këto bisedime, ministrja për Dialog, Edita Tahiri ka ngritur shqetësimet në lidhje me fushatën elektorale provokative të zyrtarëve të Serbisë gjatë qëndrimit të tyre në Kosovë, transmeton lajmi.net
Ajo ka kërkuar nga BE të përcaktoj qartësisht standardet për frymën e normalizimit në mënyrë që të parandalohen shfaqjet destruktive dhe keqpërdorimet e marrëveshjes për normalizim nga ana e zyrtarëve serb gjatë fushatës zgjedhore.
Sipas njoftimit nga Qeveria, drejtori i Zyrës për Kosovën në Qeverinë e Serbisë, Marko Gjuriq, ka kërkuar falje për hyrje në Kosovë në mënyrë ilegale më 15 prill.
“Në këtë kuadër me kërkesë të BE-së që palët të angazhohen për frymën e normalizimit dhe pas kërkim faljes nga ana e z. Marko Gjuriq për hyrje ilegale në Kosovë, palët janë zotuar që të respektohet marrëveshja për vizitat reciproke të zyrtarëve si dhe deklarimet duhet në mënyrë rigoroze të respektojnë frymën e normalizimit të marrëdhënieve mes dy shteteve”, thuhet në njoftim.
