Propozimi për futjen e lëndës së mësimit fetar në shkollat publike të Kosovës, tash e disa vite ka mbetur i pashqyrtuar, pasi ende po debatohet rreth kësaj çështje, raporton Indeksonline.
Kryetari i partisë Fjala, Gëzim Kelmendi mendon se si model për futjen e lëndës së edukatës fetare në shkolla, duhet të merret Bashkimi Evropian.
Në një prononcim për Indeksonline, Kelmendi ka thënë se modelet më të mira lidhur me këtë çështje i kanë shumica e vendeve evropiane, konkretisht Austria dhe Gjermania.
“Modelet ma të mira i kanë shumica e vendeve evropiane konkretisht Austria dhe Gjermania, prandaj mendoj që Kosova dhe Shqipëria janë të vonuara pak në këtë proces por megjithatë nuk është vonë që të bëjnë implementimin e kësaj strategjie për mësim-besimin në shkollat publike duke i ndjekur gjithmonë praktikat e Bashkimit Evropian” , ka thënë Kelmendi.
Sipas tij, lëndët fetare i ligjërojnë imamët e klerikët, varësisht prej besimit fetar.
“Në shumicën e vendeve të BE-së ata që e ligjërojnë lëndën fetare janë njerëz profesionist, lëndën që i përket besimit islam e ligjërojnë imamët dhe hoxhallarët, ndërsa atë të besimit të krishterë udhëheqësit e tyre fetar, këtë lëndë nuk mund ta ligjërojë një njeri i cili nuk ka bazë në fenë qoftë islame apo krishtere”, ka thënë ai.
Lidhur me debatin e kësaj çështje i cili nuk po shuhet, Kelmendi ka thënë se kjo duhet të organizohet në mënyrë institucionale dhe ligjore në mënyrë që keqkuptimet të mbyllen.
“Unë mendoj që çdo gjë që organizohet në mënyrë institucionale dhe ligjore i largon gjitha keqkuptimet dhe botëkuptimet e ndryshme eventuale, prandaj nëse mësim besimi organizohet në mënyrë institucionale mbi bazën e arsimit parauniversitar dhe nga imamët të cilët janë të akredituar nga Bashkësia Islame si dhe nga Kisha Katolike dhe të tjerët, i mbyll të gjitha dyert e keqkuptimeve eventuale”, ka thënë Kelmendi.
Tutje, deputeti ka thënë se nxënësve duhet të ju jepet mundësia që në mënyre institucionale të mësojnë mbi fenë, e jo në rrugë jo ligjore, përmes internetit apo personave të ndryshëm.
“Nxënësit duhet të mësojnë, krejt çka ka të bëjë me mësimin fetar, varësisht prej nivelit të nxënësve atëherë mund të zbatohet praktika e mësimit mbi fenë, varësisht për cilën fenë mësohet, nëse mësohet për islamin atëherë mësohet për pejgamberin e fundit, mënyrën se si është sill me njerëz, mënyrën e tolerancës, edukatën të cilën e ka promovuar ai dhe të cilën e promovon islami. Më vjen keq që duhet ta them këtë por populli ynë nuk ka informatë të duhura rreth islamit, i duhen informata institucionale që të kuptohet se islami është fe e paqes dhe tolerancës dhe promovon bashkëjetesë mes gjitha kombeve, gjitha feve dhe etnive të ndryshme”, ka thënë Kelmendi./Indeksonline/
