Cristiano Ronaldo sot mund të ishte një futbollist i Juventusit, dhe mund të kishte shkruar historinë me këtë skuadër. Por për fatin e keq të të gjithë tifozëve të Zonjës së Vjetër nuk ishte e thënë që të ndodhte kështu. Kjo prapaskenë mjaft interesante u zbulua nga ish trajneri i Napolit Gianni Di Marzio. Ky i fundit në sezonin 2001-2002 punonte si vëzhgues talentesh te klubi bardhezi dhe ishte gati të transferonte në Torino, Ronaldon që në atë periudhë luante te Sportingu i Lisbonës dhe ishte vetëm 18 vjec. Gianni Di Marzio i cili aktualisht punon si këshillues talentesh te Palermo në një intervistë bëri të ditur se në atë periudhë, ndoqi një takim mes Sportingut të Lisbonës ndaj Belenenses, pikërisht për të vëzhguar nga afër Cristianon.
Në përfundim të asaj sfide Di Marzio foli personalisht me futbollistin por edhe me mamanë e tij dhe të nesërmen Ronaldo udhëtoi drejt Torinos duke kaluar edhe vizitat mjekësore me Juventusin. Por për fatin e keq të bardhezinjëve ai operacion merkatoje nuk u mbyll me sukses, edhe për faktin se Marcelo Salas në atë kohë një lojtar i Juventusit por në fundin e karrierës, nuk pranoi të transferohej në Portugali si pjesë e marrëveshjes që do të conte Ronaldon në Torino. Në këtë mënyrë në valle u fut Manchester United që derdhi në arkat e Sportingut shumën e 17,5 milionë Eurove duke bërë të vetin një nga talentet më të mëdhenj të historisë së futbollit.
