Marrëdhëniet mes Kosovës dhe Shqipërisë janë model për shtetet tjera në rajon dhe më gjerë. Ky është vlerësimi që kanë bërë kryetari i Kuvendit të Kosovës, Kadri Veseli dhe kryeministri I Shqipërisë, Edi Rama gjatë një takimi të zhvilluar sot në Prishtinë.

Edhe përkundër këtyre raporteve të mira Veseli e Rama shtuan nevojën për bashkëpunim edhe më të thellë, thuhet në komunikatën e Kuvendit të Kosovës.

“Kryeparlamentari Veseli dhe kryeministri Rama, vlerësuan lart marrëdhëniet midis Kosovës dhe Shqipërisë, duke i konsideruar ato model për shtetet e tjera në rajon dhe më gjerë. Megjithatë, të dy bashkëbiseduesit shtruan nevojën e një bashkëpunimi më të thellë në të gjithë lëmenjtë, si dhe në kapërcimin e sfidave të përbashkëta në rrugën e integrimeve euro-atlantike”, thuhet në komunikatë, transmeton lajmi.net.

Gjatë takimit u shkëmbyen informacione dhe ide për zhvillimet e përgjithshme politike e ekonomike në Shqipëri e Kosovë.

Në këtë funksion, kryeministri Rama uroi kryetarin Veseli për përmbylljen e suksesshme të procesit të zgjedhjes së presidentit të ri të Republikës së Kosovës nga ana e Kuvendit, duke e konsideruar ditën e sotme si historike.

Kryetari Veseli, nga ana e tij, falënderoi kreun e Qeverisë së Shqipërisë për mbështetjen e pakursyer të politikës shqiptare dhe në veçanti të qeverisë së drejtuar nga ai, ndaj Kosovës, si në arenën ndërkombëtare, ashtu edhe në ofrimin e përvojave për konsolidimin e institucioneve shtetërore dhe procesin e integrimit evropian.