Policia e Kosovës, ka arrestuar sot personat N.R. dhe M.T. të dy me nacionalitet serb, të cilët besohet se po kryenin veprën penale ‘kontrabandim me derivate’.

Në një komunikatë për media të Policisë së Kosovës, arrestimi i këtyre personave të dyshuar është arritur pas sinjaleve dhe fotove të marra nga kamerat e sigurisë, ku të dyshuarit janë vërejtur se bënin lëvizje të kundërligjshme në zonën e Vitomiricës.

Me këtë rast në kamionin të cilin e drejtonin personat e arrestuar nga Policia e Kosovës pas kontrollit është gjetur në rimorkion e kamionit sasi të derivateve naftës, mbi 20.000 litra.

Policia thotë se në brendi të karrocerisë së kamionit ishte ndërtuar një rezervuar i modifikuar për transportim ilegal të derivateve.

Të dyshuarit nuk posedonin dokumentacionin përkatës, prandaj dyshohet se sasia e derivateve po kontrabandohej nga Serbia, që kishte destinacion Kosovën.

Me urdhrin e prokurorit kompetent të dyshuarit dërgohen në mbajtje, kurse kamioni me sasinë e derivateve të kontrabanduara është sjellë në s tacion policor dhe do të dërgohet në terminal të Doganës së Kosovës, kurse rasti i kompletuar i dorëzohet Njësisë së Hetimeve Rajonale për procedim të mëtutjeshëm.