Ministri i Integrimeve në Qeverinë e Kosovës ka zhvilluar një sërë takimesh me ambasadorë të vendeve evropiane që qëndrojnë me ambasadat e tyre në Kosovë.
“Në vazhdën e takimeve me ambasadorë të shteteve anëtare të Bashkimit Evropian lidhur me procesin e liberalizimit të vizave, ministri i Integrimit Evropian Bekim Çollaku, ka pritur sot në takime të ndara ambasadoren e Kroacisë në Kosovë Maria Kapetanoviq, ambasadorin e Austrisë Gernot Pfandler, ambasadorin e Sllovenisë Miljan Majhen si dhe shefin e Misionit në Ambasadën e Suedisë Henrik Nilsson”, thuhet në komunikatën e MIE-së, transmeton Koha.net.
Ministri Çollaku, sipas komunikatës ministrore, ka informuar diplomatët evropianë me ecurinë e tërë procesit të liberalizimit të vizave dhe ka vlerësuar se Kosova ndodhet në periudhën vendimtare sa i përket këtij procesi. “Kriteret e përcaktuara i kemi përmbushur. Tani presim vendimin meritorë që do t’i mundësojë qytetarëve tanë të lëvizin pa viza në shtetet e Zonës Schengen”, ka thënë ministri Çollaku gjatë këtyre takimeve.
Ai po ashtu ka falënderuar diplomatët e këtyre shteteve për përkrahjen e vazhdueshme që i kanë dhënë Kosovës në procesin e integrimit evropian dhe ka nënvizuar nevojën që këto shtete mike të vazhdojnë të mbështesin tani, liberalizimin e vizave. Nga ana tjetër diplomatët evropian kanë konfirmuar qëndrimin mbështetës të shteteve që përfaqësojnë për liberalizimin e vizave për kosovarët.
