Pa u përballur me të kaluarën dhe përgjegjësinë reale për luftërat në ish-Jugosllavi, nuk mund të ketë pajtim mes popujve dhe shteteve, ka deklaruar shefi i diplomacisë kroate, Miro Kovaq.
Në një intervistë për të përditshmen boshnjake, “Dnevni Avaz”, Kovaq ka thënë gjithashtu se Serbia është nismëtare e të gjitha luftërave në ish-Jugosllavi.
“Nismëtari kryesor i luftërave në Slloveni, Serbi, Kroaci, Bosnje e Hercegovinë dhe në Kosovë, ka qenë politika agresive serbomadhe. Me këtë duhet të përballemi dhe të nxirren përfundime të përgjegjshme”, ka thënë Kovaq, transmeton Koha.net.
Ministri kroat ka shtuar se përballja me të kaluarën duhet të bazohet në vlerat morale, të cilës, sipas tij, nuk i ndihmon lirimi i Voisllav Sheshelit, fakt të cilin ai e ka quajtur edhe njëherë “fyese dhe tronditëse” si dhe “shkatërrues për procesin e pajtimit mes popujve dhe shteteve fqinje”.
Kovaq ka thënë po ashtu se Kroacia pret që prokuroria e Tribunalit të Hagës të apelojë vendimin për shkak se lirimi i Sheshelit sjell përfundimin se ata [njerëz] që nxisin luftë dhe kryejnë spastrime etnike në botë dhe bëjnë ndryshime të dhunshme të kufijve tani “kanë një çek moral të bardhë” për të vazhduar me punën e tyre.
