Kolegjiumi i Degëve të LDK-së në Prishtinë, ka reaguar ndaj një shkrimi të kryetarit të Prishtinës, Shpend Ahmeti, në facebook.
Ahmeti ka shkruar se kryeministri Isa Mustafa, “po i premton asociacionin Vuçiqit dhe terminalet djemve të tij”.
“Kryetari i dështuar i Prishtinës, Shpend Ahmeti, paska marrë prapë përsipër që të merret me çështje madhore, pasi që punët në kryeqytet i ka bërë ‘fet’”, thuhet në reagimin e LDK-së.
Sipas Degëve të kësaj partie në kryeqytet, Ahmeti “ka neveritur qytetarët e kryeqytetit me keqmenaxhimin gati kriminal të Komunës, duke e shndërruar objektin e Komunën së Prishtinës në një kazermë banditësh që përgatisin molotovë për të djegur institucionet e shtetit, shtëpitë dhe makinat private të zyrtarëve të shtetit, Shpend Ahmeti, tash po përpiqet të bëjë analiza më të gjera politike”.
LDK e Prishtinës e ka quajtur Ahmetin “daktilograf të Daçiqit”.
“Në një status në facebook, Ahmeti se ka dert të luajë rolin e zëdhënësit të Daçiqit duke e cituar fije për pe, me korrektësi prej daktilografi, se çfarë ai paska thënë një natë më parë”, thuhet në reagim.
Shpend Ahmeti, sipas LDK-së, “dhe padronët e tij, komisarë të VV-së, të cilët burim të vetëm të informimit për Kosovën e kanë Daqiqin, Vuqiqin dhe të tjerët në Beograd, është mirë të fillojë të mbyll ndonjë kanalizim në Emshir, të shtrojë ndonjë rrugë në Mat, të zvogëloj radhët 6 orëshe për një certifikatë në Komunë, të rregullojë trafikun”.
“Ndërsa në pyetjen e tij se “si arritëm deri këtu?” i bëjmë me dije Ahmetit me shokë, se Republika e Kosovës, shtet sovran dhe i pavarur, i njohur nga më shumë se gjysma e shteteve të Kombeve të Bashkuara, është rezultat i sakrificave të jashtëzakonshme të popullit të Kosovës, i rezistencës paqësore të qytetarëve dhe elitës intelektuale, i luftës së lavdishme çlirimtare dhe përkrahjes së SHBA-ve dhe vendeve të tjera mike perëndimore.
“E dimë që Shpend Ahmeti dhe shokët e tij ultra-majtistë nuk besojnë dhe po i luftojnë këto vlera dhe të arritura, por populli i Kosovës, duke përfshirë qytetarët e Prishtinës, nuk do të jetë kurrë peng i skenarëve dhe ‘alternativave të domosdoshme’ të tyre”, përfundon reagimi i LDK-së.
