Pas deklaratës së ushtruesit të detyrës së ministrit të Jashtëm, Petrit Selimi, se organet e rendit do ta arrestojnë Vojisllav Sheshelin, nëse ai futet në Kosovë, ky i fundit i është përgjigjur në mënyrë shumë të çuditshme.
Kreu i radikalëve serbë ka thënë se Selimi dhe të tjerët dëshirojnë ta arrestojnë atë për t’ia marrë organet.
“Shtrohet pyetja se me çfarë baze ligjore do të më arrestonin? Nuk kanë asnjë arsye! Unë në fakt e di se çfarë ata dëshirojnë… të më arrestojnë dhe më pas të m’i marrin organet për shitje. Ata e dinë se do të përfitonin shumë, pasi që mëlçinë e kam në gjendje të mirë, është shumë e shëndoshë, gjithashtu edhe zemrën e kam mirë me të gjithë defibilatorët në të cilën Kombet e Bashkuara kanë investuar 40 mijë euro. Gjithashtu i kam të dyja veshkat dhe një organ që është në gjendje të mirë”, ka thënë Sheshel.
Ai ka paralajmëruar se Partia Radikale Serbe (SRS) do të mbajë tubim në Kosovë.
“SRS do të mbajë takimin e paracaktuar në Kosovë dhe unë do të shkoj, por nuk e di nëse do të jem pjesë e tubimeve, pasi që kam disa tubime në vende të tjera”, ka thënë Sheshel.
Ndërkaq, ushtruesi i detyrës së ministrit të Punëve të Jashtme të Kosovës, Petrit Selimi, i kontaktuar nga “Zëri”, ka thënë se nuk i lënë përshtypje deklaratat e Sheshelit pasi që sipas Selimit, Kosova është Republikë e pavarur dhe zonë e ndaluar për kriminelë si Shesheli.
“Shesheli ka qenë i arrestuar më 2003 nga Tribunali i Hagës dhe ndoshta nuk është i informuar se Kosova është Republikë e pavarur dhe zonë e ndaluar për kriminelin Sheshel. Marrëveshja e normalizimit e Brukselit si dhe marrëveshjet teknike të lidhura në Bruksel rreth vizitave të politikanëve nga Kosova në Serbi dhe anasjelltas, ka autorizuar Ministrinë e Jashtme për dhënie të lejeve të hyrjeve në territor të Republikës së Kosovës, për zyrtarë dhe politikanë serbë, si dhe persona publikë që janë objekt i shqyrtimeve të organeve të sigurisë”, ka thënë Selimi.
Ndër të tjera Selimi ka thënë se dispozitat e ligjit për të huaj parashohin mundësinë t’u ndalohet personave hyrja në Kosovë.
“MPJ e ka dërguar vendimin në Policinë e Kosovës që kriminelit Sheshel nuk i lejohet hyrja në Kosovë. Pra, nëse hyn në Kosovë ai do të kalojë kufirin ilegalisht dhe kjo besoj është bazë e mjaftueshme për arrest. Nëse ka edhe ndonjë rast të hapur për krime të luftës në Prokurorinë e Kosovës për të, këtë çështje duhet ta pyetni Prokurorinë e Kosovës”, tha Selimi.
Ndërkaq, paralajmërimi i Sheshelit për të mbajtur tubim në Kosovë, Selimi ka thënë se kjo i takon Policisë së Kosovës dhe Ministrisë së Brendshme të bëjnë analizën e rrezikshmërisë së ngjarjeve dhe tubimeve dhe eventualisht të marrin masa.
