Edhe disa muaj nuk do të mund të funksionalizohet Gjykata Speciale, pavarësisht pse ish- presidentja e vendit, Atifete Jahjaga e ka dekretuar tash e sa javë marrëveshjen e arritur ndërmjet Qeverisë së Kosovës dhe asaj të Holandës, për themelimin e kësaj Gjykate.

Kështu i kanë thënë Gazetës Blic, burime brenda Ministrisë së Punëve të Jashtme të Kosovës, ministri e cila e ka negociuar këtë marrëveshje.

“Tashmë kanë përfunduar të gjitha procedurat ligjore për themelimin dhe funksionalizimin e kësaj gjykate, por vonesa për nisjen e punës së kësaj gjykate janë mungesa e financave”, ka thënë ky burim. Sipas këtij burimi, Bashkimi Evropian, për shkak të krizës së madhe të refugjatëve, ende nuk ka arritë që ta ndajë një fond, për funksionalizimin e kësaj gjykate.

“Nevojiten disa qindra milionë euro për këtë gjykatë, të cilat duhet t’i ndajë Bashkimi Evropian”, tha ky burim brenda MPJ-së.

Ky burim thekson se me gjasë muaji shtator do të jetë koha, kur do të nis punën kjo gjykate.

“Gjithçka do të varet se kur BE do t’i ndaj mjetet për themelimin e Gjykatës”, tha ky burim.

Gjykata Speciale u krijua për t’i gjykuar ish-pjesëtarët e UÇK-së, të cilët dyshohet se kanë kryer krime lufte. Poashtu në këtë gjykatë do të zbardhen edhe pretendimet e Dick Martyt, nëse ka pasur apo jo trafikim me qenie njerëzore gjatë kohës së luftës.

Ndërkohë, është raportuar se shumë dëshmitarë tashmë kanë ikur në vende të ndryshme të Bashkimit Evropian, nga rreziku që ndiqen nga të akuzuarit e mundshëm. Thuhet se një pjesë e madhe e tyre, kanë ikur gjatë valës së madhe të ikjes së qytetarëve të Kosovës, drejt Bashkimit Evropian, e cila kishte ndodhur në fund të vitit  dhe në fillim të vitit 2015.

Gazeta Blic, ndërkaq ka raportuar se të akuzuar do të jenë hiq më pak se 11 ish- eprorë të lartë të Ushtrisë Çlirimtare të Kosovës.

Në medie janë lakuar edhe disa nga emrat e ish- komandantëve të UCK-së, e që tani kanë pozita kyçe në ushëheqjen e shtetit./ Gazeta Blic