Presidentja e Kosovës, Atifete Jahjaga e ka dekretuar Marrëveshjen Ndërkombëtare mes Kosovës dhe Holandës për themelimin e Gjykatës Speciale derisa ka hyrë në fuqi më 4 shkurt të këtij viti.
Pas këtij dekreti, Marrëveshja është publikuar në Gazetën Zyrtare duke i dhënë cilësi të dokumentit përfundimtar për zbatim. Këtë dokument e ka nënshkruar Presidenti i zgjedhur, Hashim Thaçi, në cilësinë e Ministrit të Punëve të Jashtme. Ndërsa, në emër të Holandës e ka nënshkruar Ambasadorja holandeze në Prishtinë, Gerrie Willems.
Titulli i marrëveshjes është “Marrëveshje e përkohshme ndërmjet Republikës së Kosovës dhe Mbretërisë së Holandës mbi organizimin e institucionit të Gjykatës Speciale të Kosovës i zhvendosur në Holandë”, shkruan Gazeta Express
Por, cili është qëllimi i kësaj marrëveshje?
Sipas dokumentit, kjo marrëveshje po bëhet për të siguruar mbajtjen në paraburgim të të akuzuarve, për sigurinë e dëshmitarëve dhe viktimave.
“Kjo Marrëveshje rregullon çështjet që ndërlidhen me përgatitjen për krijimin dhe funksionimin e duhur të Institucionit të Gjykatës Speciale të Kosovës në Shtetin Pranues. Ajo, ndër të tjera, krijon kushtet e favorshme për stabilitetin dhe pavarësinë e Institucionit të Gjykatës Speciale të Kosovës dhe lehtëson funksionimin e saj efikas në Shtetin Pranues në fazën përgatitore, duke përfshirë edhe për personat që duhet të jenë të pranishëm në seli dhe për transferimin e informacionit dhe materialeve, dëshmive të mundshme dhe provave brenda dhe jashtë shtetit pranues”’, shkruan në Marrëveshje.
“Sipas kësaj Marrëveshje nuk lejohet zhvillimi i procedurës paraprake gjyqësore dhe procedurave gjyqësore. Transporti dhe mbajtja në paraburgim e të dyshuarve, të akuzuarve dhe dëshmitarëve në mbajtje si dhe zbatimi i dënimeve dhe statusi ligjor i dëshmitarëve dhe viktimave do të rregullohet në Marrëveshjen për Shtetin Pranues dhe çdo marrëveshje pasuese shtesë ndërmjet Palëve”, thuhet më tej aty.
Gjykata Speciale e Kosovës është krijuar për t’i gjykuar ish-pjesëtarët e UÇK’së, për të cilët ka fakte se kanë kryer krime. Do të zbardhen edhe pretendimet e Dick Martyt nëse ka pasur apo jo trafikim me qenie njerëzore gjatë kohës së luftës, shkruan Express
Gazeta Express kishte raportuar se Presidentja e ka fshehur dekretin për marrëveshjen e Kosovës me Holandën sa i përket Gjykatës Speciale.
Marrëveshjen e plotë mund ta lexoni në këtë link:
https://gzk.rks-gov.net/ActDoc..
