Isa Mustafa është i vendosur që të mos i prishë raportet me tash presidentin e zgjedhur, Hashim Thaçi. Madje ai i ka qortuar deputetët e partisë së tij që nuk votuan për Thaçin.

I pari i qeverisë i ka përgëzuar deputetët që votuan për Thaçin president, derisa nuk ka lënë pa u marrë me deputetët që nuk ishin në sallë. Por për këto fjalë të Mustafës, kanë reaguar anëtarë të partisë së tij, raporton KTV.

Vjosa Osmani ka shkruar në Facebook se deri më tani e ka kursyer kryeministrin Mustafa, për shkak të moshës së tij dhe bashkëpunimit që kanë pasur.

Mirëpo, tani sipas saj, është bërë mjaft, derisa thotë se ka një vit që ka paralajmëruar se nuk do të marrë pjesë në seancën e turpit siç është shprehur ajo.

Kurse deputeti tjetër i LDK-së Adem Salihaj në kundërpërgjigjen e tij tha se deputetët që nuk ishin në seancë, i thirri ndërgjegjja dhe zëri i elektoratit të LDK-së, të cilët, sipas tij, ishin betuar që nuk do të bënin kurrë koalicion me PDK-në dhe kurrë nuk do ta votonin Thaçin president.

Përveç deputetëve që nuk morën pjesë fare në seancës e zgjedhjes së presidentit, kishte deputetë të tjerë të LDK-së, të cilët kishin thënë se nuk do ta votonin Thaçin.

Njëra prej tyre ishte edhe deputetja Alma Lama, e cila ka ndërruar qëndrim në momentet e fundit.