Një ditë para votimit në Kuvendin e Kosovës për Presidentin e ri të vendit, Lidhja Demokratike e Kosovës ka bërë me dije se pas konsultimeve me struktura të partisë përfshirë edhe grupin parlamentar do ta votojë Hashim Thaçin President. Por, disa deputetë të LDK’së tashmë janë deklaruar se nuk do ta votojnë Thaçin për President, pavarësisht marrëveshjes LDK-PDK.
Partneri i koalicionit qeverisës, Lidhja Demokratike e Kosovës ende nuk ka arritur t’i bindë të gjithë deputetët e vetë që nesër ta votojnë Hashim Thaçin e PDK’së për President të vendit, pavarësisht se në një njoftim për media të LDK’së thuhet që ky subjekt është dakorduar që t’i përmbahet marrëveshjes.
Kundër Thaçit President, po vazhdojnë të jenë edhe me tutje deputetët, Adem Salihaj, Vjosa Osmani, Arben Gashi, Armend Zemaj.
Një qëndrim kundër Thaçit por jo përfundimtar e kanë dhënë edhe Alma Lama e Doruntinë Maloku.
Po ashtu edhe deputetja Melihate Tërmkolli nuk e ka dhënë ende një mendim përfundimtar se a do ta votojë ose jo Thaçin.
Derisa, Fatmir Rexhepi, gjithashtu është njëri nga deputetët e LDK-së që nuk ka votuar Qeverinë e koalicionit PDK-LDK në nëntor të vitit 2014, ndërsa nuk është deklaruar asnjëherë nëse do të votojë Thaçin për president siç e parasheh marrëveshja e koalicionit.
E, partia që aktualisht drejtohet nga Isa Mustafa, LDK gjatë ditës së sotme ka lëshuar një njoftim për media me anë të së cilës shfaq bindjen e vet se deputetët e kësaj partie të premten do të votojnë në bazë të marrëveshjes politike ndërmjet PDK’së dhe LDK’së.
Mirëpo, në këtë njoftim LDK nuk ka treguar askund se a do të jenë edhe deputetët që janë deklaruar kundër Thaçit pjesë e këtij votimi.
“Anëtarët e të gjitha strukturave të LDK-së, kanë kërkuar pa ekuivok nga përfaqësuesit e saj në institucionet qendrore që LDK-ja si parti me traditë të gjatë institucionale dhe me kontribut vendimtar në themelimin dhe ndërtimin e shtetit të Kosovës, t’i përmbahet parimeve të saj, duke përmbushur obligimet politike e kushtetuese të dala nga marrëveshja për krijimin e institucioneve në këtë mandat qeverisës, duke përfshirë zgjedhjen e Presidentit të Kosovës, sipas kësaj marrëveshjeje”.
Duke iu referuar gjendjes aktuale në vend, të gjitha strukturat e LDK-së kanë kërkuar që LDK-ja, si gjithnjë, të luaj rol konstruktiv në funksionalizmin e plotë të institucioneve të shtetit dhe krijimin e kushteve për realizimin e prioriteteve dhe objektivave nacionale.
Lidhja Demokratike e Kosovës në fund të këtij njoftim ka thënë se pret që të premten të gjithë deputetët e LDK-së në Kuvendin e Kosovës të veprojnë në përputhje me marrëveshjen politike të përkrahur nga strukturat e LDK-së, në mënyrë që t’i shërbejnë funksionalizmit të plotë të institucioneve të Kosovës./Gazeta Express/.
