Kyetari i Aleancës për Ardhmërinë e Kosovës (AAK), Ramush Haradinaj, ka bërë me dije se insistimi i Qeverisë aktuale për ta vazhduar punën është duke e thelluar edhe më shumë krizën politike në vend.
Ai ka thënë se opozita ka filluar metodën e re të kundërshtimit 24 orësh të Qeverisë për shkak të mosreflektimit të kësaj të fundit.
Në këtë intervistë për “Epokën e re”, Haradinaj ka vlerësuar se ky koalicion qeverisës po krijon vonesa për një fillim të ri të mbarë për Kosovën. “Mungesa e reflektimit dhe insistimit për të vazhduar është duke e thelluar më shumë krizën politike në vend dhe po ia vonon Kosovës mundësinë për t’u nisë së mbari. Ne po e vazhdojmë këtë kundërshtim, kurse përjashtimi i deputetëve në seancën e fundit ka qenë joligjor, sepse përjashtimi i deputetëve duhet të bëhet ose prej seancës, ose prej Kryesisë së Kuvendit, e jo nga kryetari i Kuvendit”, ka thënë Haradinaj.
Sipas tij, subjektet politike opozitare nuk do të largohen nga sheshi para institucioneve qendrore deri në shpalljen e zgjedhjeve të reja. “Deri në dorëheqje të Qeverisë apo në shpalljen e zgjedhjeve ne do të jemi në shesh dhe nuk do të tërhiqemi. Ky është një epilog i logjikshëm i gjithë këtij angazhimi kundërshtues opozitar, jo vetëm i forcave politike opozitare, por edhe të qytetarëve të shqetësuar për gjendjen aktuale në vend. Ne jemi aty deri në shpalljen e zgjedhjeve apo dorëheqjen e Qeverisë”, është shprehur Haradinaj.
Kreu i AAK-së nuk beson se lideri i PDK-së, Hashim Thaçi, do të mund të zgjedhet president. Ai shpreson se do të ketë deputetë nga LDK-ja dhe PDK-ja që nuk do ta bëjnë kuorumin për t’u mbajtur seanca për presidentin. “Në këtë rast, shpresoj se z. Thaçi nuk do të zgjedhet president.
Besoj se në koalicionin qeverisës ka plotë deputetë të vetëdijshëm të cilët vlerësojnë se nuk është shërbim i duhur për Kosovën zgjedhja e tij (Thaçit) president në këto rrethana”, është shprehur Haradinaj, duke shtuar se bërja e kuorumit në këtë seancë është votë për Thaçin president dhe thëllim i krizës për Kosovën. “E rëndësishme është të mos bëhet kuorumi për zgjedhjen e presidentit.
Bërja e kuorumit për z. Thaçi është votë për të. Të gjithë ata deputetë që marrin pjesë në seancë, qoftë duke u shpall kandidatura të dikujt si pretekst për të qëndruar në seancë, janë lojëra që vërehen dhe që kanë të bëjnë vetëm me bërjen e kuorumit për president. Bërja e kuorumit është votë për z. Thaçi dhe është thëllim i krizës për Kosovën”, ka thënë lideri i AAK-së.
