Donika Gërvalla-Schwarz, aktiviste e LDK-së në Gjermani dhe vajza e ish-veprimtarit Jusuf Gërvalla, ka bërë të njohur në “Interaktiv” të KTV-së krahun e ri brenda LDK-së. Ajo gjithashtu tha se “dita e premte do jetë ditë e dështimit të madh të Thaçit. Shumë deputetë të LDK-së nuk do ta votojnë Thaçin”.
“Lëvizja brenda LDK-së, ‘LDK 2020’, do të jetë për zgjedhjet që do të vijnë”, ka zbuluar Gërvalla duke thënë se ai krah nuk do të jetë kundër LDK-së, transmeton Koha.net.
Donika Gërvalla do të jetë personi përgjegjës për këtë lëvizje reformuese, që sipas saj do të të jetë një shansë që elektorati mos të zhgënjehet.
Kjo lëvizje, sipas Gërvallës, ka përkrahje të madhe dhe se anëtarët duhet të jenë detyrimisht edhe të LDK-së.
Deputetët e LDK-së, sipas Donika Gërvallës, e kanë mundësinë të tregojnë se në cilën rrugë do të shkojë LDK-ja të premten, kur do të votohet Hashim Thaçi për president të vendit.
Ajo ka thënë se brenda deputetëve ka shumë të dëmtuar nga Thaçi dhe SHIK-u, kështu që sipas Gërvallës, disa deputetë nuk do të votojnë për Thaçin.
Gërvalla ka thënë se udhëheqja e LDK-së është e padenjë dhe se Mustafa e ka çuar partinë buzë greminës.
Ajo ka treguar premtimin e thyer të Mustafës nga fushata zgjedhore.
“Ka qenë premtim konstant që votat që shkojnë në LDK, nuk do të shkojnë në PDK. Mustafa këtë e ka thyer”, ka thënë Gërvalla, duke vazhduar se ka shumë deputetë të LDK-së nuk e dinë as se çka përmban marrëveshja e koalicionit PDK-LDK.
Ajo ka folur për elektoratin e LDK-së dhe për disponimin e tyre. Shumë deputetë të LDK-së, tha Gërvalla, që nuk do të votojnë për Thaçin, duke shtuar se ata po kërcënohen.
“Dita e premte do jetë ditë e dështimit të madh të Thaçit. Shumë deputetë të LDK-së nuk do ta votojnë Thaçin. Deputetët janë nën presion, ata po kontaktohen edhe nga Hashim Thaçi”, ka thënë Gërvalla.
