Edhe pse viti që e lamë pas shënoi rënie në numrin e vrasjeve për 28.57%, megjithatë janari filloi me vrasjen e një 22 vjeçari nga Suhareka, raporton Indeksonline.
Ndërsa muaji shkurt u përcoll me dy vrasje dhe dy tentim vrasje, e sfidë të veçantë të sigurisë paraqet posedimi ilegal i armëve.
Njohësi i çështjeve të sigurisë, Burim Ramadani tha për Indeksonline se numri i madh i vrasjeve dhe përdorimi i armëve të vogla, në përgjithësi, është një sfidë e madhe e ndërtimit të sigurisë njerëzore në Kosovë.
Sipas Ramadanit, në aspektin reagues Policia e Kosovës ka treguar suksese.
“Në aspektin operacional dhe reagues, Policia e Kosovës ka dhënë suksese të nivelit të caktuar. Por, ajo që është domosdoshmërisht e rëndësishme është qasja strategjike, programore, për reduktimin e dukshëm të posedimit ilegal të armëve deri në largimin e plotë të tyre. Pra, vlerësoj se në aspektin reagues, Policia ka pasur suksese, por këto paraqesin kryesisht një qasje ad-hoc. Duhet qasje strategjike” , tha Ramadani për Indeksonline.
Shembujt në shoqëri jepen kryesisht përmes ndëshkimit të së keqes. Edhe në rastin e vrasjeve, institucionet e sigurisë dhe të drejtësisë duhet të ndërtojnë ambientin e ndëshkueshmërisë së lartë dhe efektive.
Për njohësin e çështjeve të sigurisë, kjo fatkeqësisht nuk është në nivelin e duhur as në rastin e vrasjeve dhe hiq e më hiq në rastet e posedimit ilegal të armëve.
“Dënimet nuk janë në përputhje me dëmin që shkaktohet në shoqëri. Në asnjë variant, logjikat e vetëmbrojtjes nuk janë ndihmuese, nuk janë të dobishme dhe aq më pak ligjore” , tha Ramadani.
Sipas Ramadanit, janë tri elemente kryesore që po ndikojnë në shtimin e vrasjeve.
“Kryesisht, mendoj, janë tri elemente. Së pari, numri i madh i posedimit ilegal të armëve në duart e qytetarëve. Së dyti, mungesa e qasjes strategjike për largimin e këtyre armëve. Dhe, së treti, dënimet jo proporcionale, përkatësisht dënimet e ulëta për vrasjet dhe pothuajse mungesë e plotë e dënimeve për posedim ilegal të armëve” , tha Ramadani.
