Kryeministri i Shqipërisë, Edi Rama, si edhe herë të tjera, nuk ka ngurruar t’ua thotë troç zyrtarëve të BE, se ata tregohen më të kujdesshëm me Serbinë, sepse shqiptarët nuk e kanë Rusinë.
Sipas një njoftimi për media të lëshuar nga Zyra e Kryeministrit shqiptar, gjatë seancës së pyetje përgjigjeve në Samitin e BERZH në Londër kryeministri Edi Rama pati një shkëmbim batutash me kryeministrin e Serbisë, Aleksader Vuçiç.
Ndër të tjera, kryeministri Rama tha se BE nuk po i liberalizon vizat për Kosovën, dhe Shqipërisë po i thotë se ju jeni duke ecur mirë, por ende keni për të bërë, dhe e gjithë kjo se shqiptarët nuk e kanë një vend tjetër të fortë mik, siç e ka Serbia Rusinë, transmeton lajmi.net.
“BE është më e kujdesshme ndaj tyre sesa ndaj nesh, sepse ne nuk kemi Rusinë. Kështu, ata ende nuk liberalizojnë vizat për qytetarët e Kosovës, neve na thonë ju jeni duke ecur shumë mirë, por keni ende për të bërë. Ndërsa ai fluturon në Rusi dhe merr hapjen e negociatave”, ka thënë Rama.
