Nga sot e deri më 28 shkurt, në Qendrën Klinike Universitare të Kosovës do të mbahet Java e Shëndetësisë kosovaro-turke. Kjo vjen si rezultat i marrëveshjes së bashkëpunimit në mes të Ministrisë së Shëndetësisë së Kosovës dhe asaj të Turqisë.
Gjatë kësaj jave, specialistë të fushave mjekësore nga Turqia do të kryejnë operacione të ndërlikuara për pacientët e Kosovës.
“Ekspertët më eminentë nga Turqia që do të vijnë në Kosovë janë nga fusha e kardiologjisë, kardiokirurgjisë së të rriturve dhe fëmijëve, anestezionit dhe mjekimit intensiv, kirurgjisë së fëmijëve, obstetrikës me gjinekologji, kirurgjisë plastike dhe rekonstruktime, urologjisë, kirurgjisë abdominale, oftalmologjisë dhe infermierisë”, thuhet në njoftimin e dërguar nga Ministria e Shëndetësisë.
Është hera e tretë që po bëhet një organizim i tillë, gjatë të cilit, ekspertë mjekësor nga Turqia vijnë në Kosovë për të realizuar operacione të ndërlikuara për pacientët kosovarë, dhe për ta mbështetur shëndetësinë kosovare, krahas ndërhyrjeve, edhe me ligjërata, seminare dhe diskutime profesionale.
Hapja zyrtare e Javës së shëndetësisë kosovaro-turke do të bëhet sot duke filluar nga orën 9:00, në Sallën e Konferencave të QKUK-së (Klinika e Kirurgjisë).
