Analisti Imer Mushkolaj ka thënë se qytetarët nuk duhet të ndikohen nga zëvendëskryeministri Thaçi që në protestat e ardhshme të bëjnë veprime që i priste Thaçi. Ai ka thënë gjithashtu se Thaçi nuk mund të zgjidhet president, aq më pak pas deklaratave të djeshme.
“Ai nuk ka qenë person unifikues dhe veprimet e atilla që i ka bërë, i ka bërë pas shumë presioneve. Ai nuk mund të jetë president, aq më pak pas fjalëve të djeshme në konferencë për medie”, ka thënë Mushkolaj, transmeton Koha.net.
Mushkolaj në një intervistë në “Interaktiv” të KTV-së, ka thënë se efekti i protestës është dashur të shihej nga veprimet që do t’i merrnin Mustafa dhe Thaçi, e që në fakt sipas Mushkoljat, të dy nuk e kanë marrë seriozisht atë që e ka kërkuar populli në protestë.
Ai më tej ka thënë se qytetarët kanë pasur sjellje të mirë dhe kanë demantuar të gjitha skenarët e këqija të paralajmëruara.
“Qytetarët demantuan të gjithë ata që menduan se do të ketë dhunë duke përfshirë edhe komunikatën e Policisë së Kosovës, se brenda turmës mund të ketë persona të armatosur”, ka thënë Mushkolaj.
Analisti Mushkolaj është ndalur tek deklarata e Thaçit se nuk do t’i priste me kafe brenda Qeverisë.
“Nëse nuk do t’i pret me kafe, me çka do t’i priste, me plumba? Duhet ta sqarojë këtë”, është shprehur Mushkolaj.
Krejt këtë krizë, Mushkolaj e sheh të përfunduar me procesin e zgjedhjeve.
