Veton Surroi në Rubikon të KTV-së ka folur edhe për procesin e Vjenës që i ka paraprirë procesit të pavarësimit të Kosovës.
“Ne kemi pasur procesin e Vjenës dhe në atë proces kryesues ka qenë Ibrahim Rugova, Ai është përpjekur që të ruajë një konsensus. Po flasim për Rugovën që në atë kohë nuk e kishte Fehmi Aganin dhe në atë proces ai është përpjekur të krijojë konsensus. Ashtu siç e kishim në Rambouillet”, transmeton Koha.net.
Surroi ka shtuar se Rugova e ka bërë këtë edhe në kushte jo të favorshme, edhe në kushte kur është sulmuar dhe është ofenduar nga Thaçi në mbledhje të mbyllura. “Thaçi ka thënë fjalë të këqija për Rugovën, edhe në prani të Shalës, Dacit, Hysenit, e Kosumit. Më duket se Shala pati folur në Rubikon mu për këtë çështje”, tha Veton Surroi.
Surroi mendon se pas pavarësisë nuk ka pasur asnjë arsye që të mos arrihet një formë e bashkëpunimit që do të përfshinte pushtetin dhe opozitës. Këtu nuk duhet fajësuar opozitën.
“Unë e kam kritikuar Rugovën edhe hapur edhe sy më sy për vendimet që duhej marrë. Kemi biseduar dhe kemi bashkëpunuar deri në fund të jetës së tij. Kemi pasur momente që nuk kanë qenë të këndshme. Mendoj se historikisht bëri disa veprime të gabueshme e ato janë izolimi politik në disa vite, pacifizmi i plotë të tij, pritja se dikush tjetër do të vijë t’i kryejë punët për ne dhe mos identifikimi fillestar se UÇK-ja ka qenë forcë autoktone, për të cilën mund të ketë pasur një arsye. Pastaj kanë qenë gabimet pas luftës kur është dashur të krijohet një tërësi, por është gabim edhe i palëve që nuk bashkëpunuan. Thaçi ka dashur të bëhej kryeministër pa ndonjë konsensus”, ka thënë Surroi.
