Zëvendëskryeministri i Kosovës, Hashim Thaçi ka thënë se veprimet e opozitës po i bëjnë dëm shtetit e jo koalicionit qeverisës. Sipas tij, ka hapësirë për komunikim mes pozitës dhe opozitës, për të gjetur zgjidhje.
Në televizionin publik ai ka folur edhe për çështjen e presidentit, për të cilën ka thënë se nuk ka asnjë dilemë se do të zgjidhet në mënyrë kushtetuese dhe me votat e deputetëve nga koalicioni qeverisës, ashtu siç e thotë marrëveshja.
Ministri i Punëve të Jashtme, Hashim Thaçi tha se nuk është zgjidhje dhe qasje e drejtë, që përmes dhunës dhe metodave jo-demokratike, të synohet që të arrihen objektivat politike.
Sipas tij, kauza e opozitës është e padrejtë dhe metodat e përdorura nga ta janë të papranueshme për qytetarët dhe për ndërkombëtarët.
Derisa foli për kërkesën e partive opozitare për të shkuar në zgjedhje të parakohshme, Thaçi tha se ato do të ndodhin në vitin 2018. Ai tha se opozita e di rezultatin që do të dilte nga procesi zgjedhor.
“Nuk janë të disponuar për zgjedhje sepse e dinë rezultatin. Më shumë është zhurmë. Nuk do ta pranojnë rezultatin zgjedhor dhe do të vazhdojnë me veprimet e tyre. Tash ne a të bëjmë procese zgjedhore për çdo tre muaj derisa një parti të del e para”, ka thënë ai.
Ai këshillon partitë opozitare të mësojnë t’i fitojnë zgjedhjet, e përmes kësaj, tha se do të mësojnë të qeverisin.
“Këto dy elemente u mungojnë opozitës”, tha ai.
Situatën aktuale në Kosovë, Thaçi e quajti çrregullim veprues opozitar, e jo krizë, përcjell KP. Thaçi tha se në Kosovë duhet të ketë komunikim në mes të liderëve politikë dhe Kuvendi të vazhdojë punën normale.
Sipas Thaçit, metodat që po përdorë opozita janë krejtësisht të papranueshme dhe të dëmshme për shtetin, e jo pushtetin.
Ai tha se statuti i Asociacionit të komunave me Shumicë serbe do të hartohet në përputhje me Kushtetutën, derisa për marrëveshjen për Demarkacionin tha se nëse ka gabime në proces, ato do të korrigjohen. Sipas Thaçit, ka hapësirë të që partitë politike në vend të ulen e të diskutojmë dhe të gjejmë zgjidhje.
Ndërsa për zgjedhjen e presidentit, Thaçi tha se do të jetë transparentë dhe se do të ndodhë gjatë muajit shkurt.
“Do të jetë në muajin shkurt seanca për presidentin, kur të vendosë Kryesia e Kuvendit”, ka thënë Thaçi.
Ai thotë të mos ketë asnjë dyshim për votat që atë do ta bënin president. Procesi i qartë, kemi marrëveshjen e koalicionit. Nuk kam asnjë dilemë për të pas dyshim. Kam besim të plotë në koalicion, siç ka qenë marrëveshja”, ka thënë ai.
Pasi u pyet për themelimin e Forcave të Armatosura të Kosovës, Thaçi tha se është në dorën e Kosovës ta bëjë këtë. Sipas tij, ushtria do të bëhet, e që do të jetë një forcë multietnike.
Ai ka folur edhe për vizitën e Sekretarit Amerikan të Shtetit, John Kerry, duke thënë se vizita të tilla dëshmojnë për raportet e mira që ShBA-të kanë me shqiptarët. Sipas tij, deklarata e sekretarit Kerry për Kosovën, dhe mesazhet e tij, duhet të merren seriozisht nga të gjithë.
