Rajoni i Ballkanit Perëndimor do të normalizohet, por Brukseli zyrtar nuk duhet të vonojë proceset, sepse në të kundërtën mund të shkaktohen kriza, ka thënë zëvendëskryeministri i Kosovës, Hashim Thaçi, në fjalën e tij në konferencën e tretë ndërkombëtare “Gërmia Hill”, e cila është organizuar nga Ministria e Punëve të Jashtme dhe Aspen Institute.
“Disa gjëra që mund t’i arrijmë për 3-4 muaj, nuk kanë pse të vonohen për disa vite. Rajoni jonë do të normalizohet, por çdo vonesë e Brukselit do të shkaktojë kriza”, ka thënë Thaçi.
“Ne do të përgatitemi shumë mirë edhe për takimet e radhës, të Berlinit, të Vjenës”, ka pohuar Thaçi, duke paralajmëruar se “do të fillojnë proceset e rëndësishme infrastrukturore sidomos në ndërtimin e autostradës Prishtinë-Nish”, tha zv/kryeminsitri Thaçi, transmeton Klan Kosova
Thaçi tha se “do të punojmë shumë edhe në aspektin e sigurisë, në luftimin e korrupsionit dhe krimit, në luftimin e radikalizmit”, ndërsa “ne kemi nënshkruar marrëveshje me Malin e Zi dhe do ta respektojmë në tërësi ne kemi marrëdhënie të shkëlqyeshme me Malin e Zi”.
Në këtë konferencë ndërkombëtare po marrin pjesë afro 200 mysafirë nga 40 shtete të ndryshme të botës.
Tema e konferencës është Siguria në Evropën Juglindore në kontekst të sfidave më të gjera rajonale.
“Gërmia Hill” synon që të ndihmojë Kosovën në promovimin e agjendës së integrimit në NATO, duke e përfshirë vendin tonë në debatet e rëmdësishme të sigurisë rajonale.
