Edhe pse është numri dy i AKR-së, Mimoza Kusari Lila thotë se subjekti i saj ka dështuar politikisht.
Në Rubikon, ajo ka thënë se është identifikuar nevoja për ndryshime brenda AKR-së në një parti liberal demokrate, që të shkojmë përtej asociimit të një individi përtej Pacollit dhe Mimozës.
“Ne duhet ta sjellim atë të bëjë jo vetëm pa Pacollin por dhe pa mua. Kosova ka shumë njerëz që mund të bëjnë dhe të jenë aleat të një AKR-je tjetër, të cilës mund t’i ndryshohet edhe emri.”
Kusari Lila ka thënë se Pacolli nuk ka pasur prezencë fizike në Kosove, por sipas saj, ka munguar edhe vullneti që të ballafaqohen me atë që është e pajustifikueshme e që është ndërrimi i emrit dhe profilizimi i partisë…
“Kemi humbur kohë dhe kemi humbjet evidente, por ato janë të evitueshme sepse po flitet për riorganizim të skemës politike në vend dhe AKR-ja duhet të prezantojë një ofertë të re, e cila nuk duhet të jetë e lidhur me individë, por me një grup njerëzish. E them një rigrupim i njerëzve në Kosovë dhe t’i ofrojë popullit një ofertë të re. Dhe them se secili në AKR duhet të japë mendim rreth opsioneve për të vazhduar përpara që ajo të ketë një identitet të ri të një partie liberal demokratike”.
Kusari Lila ka pranuar se si subjekt politik kanë dështuar në politikë dhe nuk kanë ditur të bëjnë politikë edhe pse ka pasur individë profesionalë.
Por, ka mohuar se do të bashkohet me PDK-në e Thaçit dhe, sipas saj, kjo është bërë me qellim të denigrimit të personalitetit të saj për ta lidhur atë më SHIK-un e Veselit.
“PDK-në e njoh që nga 2003-ta dhe kurrë nuk kam pasur pretendime të aderoj aty. Nuk e di dhe nuk e kam dëgjuar që Kadri Veseli më ka ftuar. Kjo është bërë prej dikujt që ka qellim që të më lidhë mua me SHIK-un e Veselit dhe mendoj se ka ardhur nga strukturat lokale të partive opozitare të Gjakovës. Por e them absolutisht nuk do të hyj në asnjë parti ekzistuese. Më shumë ka gjasa të mbetem këtu ku jam dhe siç thash ta riorganizoj AKR-në apo ta ndryshoj atë.”
