Në Ballë për Ballë me Shkodran Gajrakun, Kushtrim Puka nga Forumi për Iniciativë Qytetare – FIQ, ka thënë se ka mungesë transparence në procesin për termocentralin Kosova e Re, transmeton Klan Kosova.
“I gjithë procesi për Kosovën e Re është bërë prapa dyerve të mbyllura dhe larg publikut, nuk ka pasur transparencë”.
“Ne si grup kemi shprehur shqetësimin kur është vendosur që të vazhdohet procesi i tenderimit me vetëm një ofertues”.
Ai ka thënë se veprimet e bëra në këtë proces janë në kudnërshtim me ligjin, ndërsa edhe vet projekti nuk bën gjë tjetër veçse në një afat të caktuar çmimi i energjisë do të rritet disa fish.
“Ligji është shkelur me këtë procedurë, ligji për prokurim publik nuk e lejon që të vazhdohet nëse ka më pak se dy ofertues”.
“I gjithë ky proces është bërë pa u konsultuar Kuvendi i Kosovës, nëse në këtë pjesë të procesit është anashkaluar Kuvendi, ne nuk presim që të ketë përgjegjësi parlamentare në vazhdim”.
“Me këtë projekt do të ketë rritje të çmimeve të energjisë elektrike 300%”.
“Ne tani paguajmë 52 % më shumë se kostoja reale e energjisë krahasuar me vendet e rajonit”.
Puka po ashtu ka thënë se pretendimet që ky projekt do të jetë gjenerator i vendeve të punës janë të pavërteta.
“Një investim i tillë nuk do të gjenerojë 10 mijë vende pune as në procesin e ndërtimit sepse është shifër shumë e lartë dhe kjo nuk ka ndodhur në asnjë vend ku është bërë një ndërtim i tillë”.
