Liderët perëndimorë të cilët u takuan në margjinat e samitit të javës së kaluar të G20 në Turqi janë pajtuar që të vazhdojnë sanksionet kundër Rusisë për veprimet e saja në Ukrainë edhe për gjashtë muaj tjerë deri në korrik të vitit të ardhshëm, ka thënë një diplomat evropian për Reutersin.
Vendimi është marrë edhe përkundër thirrjeve të shpeshtuara për bashkëpunim më të madh me presidentin rus Vladimir Putin në luftën kundër militantëve të Shtetit Islamik pas sulmeve të 13 nëntorit në Paris që vranë 130 persona.
Presidenti amerikan Barack Obama, Angela Merkel e Gjermanisë, David Cameron i Britanisë, Matteo Renzi i Italisë dhe ministri i Jashtëm francez Laurent Fabius, që përfaqësoi Presidentin francez, Francois Hollande në Samit, morën pjesë në takimin e shkurtër në përfundim të takimit të G20-ës në Antalia, transmeton Koha.net.
Diplomati ka thënë se liderët e kanë marrë këtë vendim pasi që kanë vlerësuar se është me rëndësi të madhe për ta vazhduar presionin ndaj Rusisë para zgjedhjeve të planifikuara në Ukrainën lindore.
“Zgjedhjet në Ukrainë kanë peshë të madhe. Ne mund të fitojmë atë që dëshirojmë vetëm duke e luajtur kartën e sanksioneve. Sanksionet financiare duhet të vazhdojnë deri në fundin e hidhur”, ka thënë diplomati që ka kërkuar të mbetet anonim për shkak se marrëveshja ka qenë konfidenciale.
