Kryetari i “pazëvendësueshëm” i Hanit të Elezit, i pavaruri Rufki Suma, në një bisedë për “Kohën Ditore”, e ka pranuar se komuna që drejton ai edhe pse është buzë kufirit me Maqedoninë më shumë është penalizuar sesa është favorizuar.
Edhe pse në pikën kufitare të Hanit të Elezit mendohet se më tepër se 50 për qind e buxhetit arkëtohet për shtetin, Suma thotë se komuna që ai drejton nuk përfiton asnjë cent nga të hyrat në këtë pikë doganore.
“Edhe pse Hani i Elezit është komunë kufitare, kjo aspak nuk na ndihmon apo privilegjon, përkundrazi më shumë na penalizon, sepse ne detyrohemi të paguajmë edhe ndriçimin nga pika kufitare deri në qendër të Hanit të Elezit, të cilin projekt e kemi realizuar me ndihmën e kompanisë “Sharrcem”, por jo të Qeverisë”, ka thënë Suma.
Hani i Elezit ndërkaq është diskriminuar edhe në aspektin e punësimit në këtë pikë kufitare.
Veç kësaj, Suma ka folur edhe për tri pikat qeverisëse që mendohet se e bëjnë atë të pazëvendësueshëm tash për tash në Han të Elezit, si kryetar.
