Franca (lexo: shtetet e konsoliduara) dhe Kosova (lexo: shtetet e pakompletuara/pakonsoliduara) janë apo mund te jenë cak i sulmeve terroriste, sepse, tek të parat, mesazhi politik është tejet i fuqishëm dhe, tek te dytat, mundësia e realizimit është tejet më e madhe, më e lehtë.
1. Askush nuk është i paprekshëm. Asnjë shtet, pavarësisht fuqisë ushtarake, diplomatike, ekonomike apo tjetër.
2. Shtetet e brishta e të pakonsoliduara duhet të bashkëveprojnë me shtetet e konsoliduara dhe shtetet rajonale, sepse pafuqia e tyre mund të lehtësojë aktivitetet terroriste, të shkaktojë sfida edhe për të tjerët, prandaj të tjerët duhet të ndihmojnë ato fuqishëm.
Të dy këto hipoteza janë vërtetuar (edhe njëherë) nga sulmi i tmerrshëm terrorist, të premten në mbrëmje në Paris. Edhe Franca (hipoteza e parë) edhe Kosova (hipoteza e dytë) janë baraz të kërcënuara nga terrorizmi. Kështu, kjo tezë duhet të përcillet me veprime të vendosura shtetërore dhe bashkëveprim në aleanca globale, por edhe rajonale. Sepse, në sytë e terroristëve ne jemi të njëjtë, në njërën anë, dhe aktet terroriste janë të pamundshme të parandalohen një qind për qind, në anën tjetër.
Franca (lexo: shtetet e konsoliduara) dhe Kosova (lexo: shtetet e pakompletuara/pakonsoliduara) janë apo mund te jenë cak i sulmeve terroriste, sepse, tek të parat, mesazhi politik është tejet i fuqishëm dhe, tek te dytat, mundësia e realizimit është tejet më e madhe, më e lehtë. Mesazhi i tmerrit, që terroristët duan ta përhapin nëpër botë, mund të ketë nivel më serioz në rastet e sulmeve ndaj shteteve të fuqishme. Ndërsa, mund të ketë numër më të madh ndaj shteteve të brishta.
Tek e fundit, terrori, frika dhe kërcënimi me dhunë janë thellësisht kundër konceptit njerëzor të lirisë. Goditja e lirisë, për demokracitë, është goditje e ekzistencës, goditje e thelbit të sigurisë dhe mirëqenies. E tillë duhet të shihet edhe nga ne, të pademokratizuarit.
Terrorizmi global është kërcënim i qenies njerëzore, jo vetëm ndaj Perëndimit. Është e keqja e pakrahasueshme përgjatë historisë. Terrorizmi është kthyer në një mur të madh, të cilin njerëzimi duhet ta thyejë e ta shkatërrojë plotësisht.
Lufta ndaj ISIS-it dhe organizatave tjera terroriste është e pandalshme, por duhet shumëfishuar fuqinë e përdorur ndaj saj. Sigurisht, lufta e shkallës së gjerë ndaj ISIS-it është tashmë e pashmangshme.
Dhe, Kosova, bashkë me shtetet e Ballkanit, duhet të angazhohet në një iniciativë të përbashkët në bashkëveprim kundër terrorizmit. Kjo i tejkalon ndasitë tjera ballkanike. Përndryshe, bazuar në brishtësinë e shteteve veç e veç dhe në ndarjet e thella ndër-shtetërore, Ballkani nuk do të mund të përballej fuqishëm ndaj tmerrit të mundshëm terrorist. x/zeri/
