Kryeministri Isa Mustafa ka thënë të shtunën se sulmet në Paris e bëjnë të qartë se terrorizmi është bërë problem global. Sa i përket sigurisë në Kosovë, kryeministri Mustafa tha se qytetarët e Kosovës janë të sigurt, por se duhet të tregohet kujdes dhe të punohet shumë që akte të tilla të mos lejohet të ndodhin.
Duke rishprehur keqardhjen dhe dhimbjen për viktimat në Francë, kryeministri Mustafa tha se Qeveria e Kosovës, përmes organeve të rendit dhe zbatimit të ligjit, ka ndërmarrë masat e nevojshme në luftën kundër terrorizmit.

“Sulmet e tilla flasin se ne kemi probleme jo vetëm në vende të caktuara sa i përket terrorizmit, por është bërë një problem global. Ne edhe për këtë arsye kemi aprovuar Strategjinë Kundër Terrorizimit dhe Ekstremizmit në Qeveri, dhe po mundohemi që përmes organeve konkrete, organeve të Punëve të Brendshme, Agjencisë së Inteligjencës, por edhe përmes bashkëpunimit me shoqërinë civile dhe institucionet tjera, të mbajmë aktivitetin tonë sa i përket luftës kundër terrorizmit. Mua më vjen keq, dhe e kam shprehur edhe mbrëmë keqardhjen time dhe dhimbjen për viktimat që kanë ndodhur atje. Sigurisht që duhet të gjithë ne të jemi syçelë, dhe të punojmë shumë që ajo mos të ndodhë në asnjë pjesë të botës, mos të ndodhë as në Kosovë”, tha kryeministri Isa Mustafa, gjatë një vizite në Istog.